Reseıdegi QR elshiligi Jambyldyń 172 jyldyǵyna oraı baıqaý jarııalady
15:03, 28 Aqpan 2018
ASTANA. QazAqparat - Reseı Federatsııasyndaǵy Qazaqstan Respýblıkasynyń elshiligi aqyn Jambyl Jabaevtyń týǵanyna 172 jyl tolýyna oraı vıdeorolıkter baıqaýyn jarııalady, dep habarlaıdy «QazAqparat» HAA tilshisi elshiliktiń resmı saıtyna silteme jasap.
Elshiliktiń aqparat kózinde jazylǵandaı, qystyń sońǵy kúni qazaqtyń uly aqyny Jambyl Jabaevtyń týǵanyna 172 jyl tolady.
«Osyǵan baılanysty Reseı Federatsııasyndaǵy Qazaqstan Respýblıkasynyń elshiligi vıdeorolıkter baıqaýyn jarııalaıdy. Oǵan qatysýdyń sharttary qarapaıym: aqynnyń ózińizge unaǵan shyǵarmasyn tańdap alyp, sol óleńmen baılanysatyn vıdeorolık túsirińiz. Osydan keıin álgi vıderolıkti #PosolstvoRKvRF #SDnemRojdenııaJambylJabaev heshtegterimen áleýmettik jelige salyp, elshiliktiń paraqshasyn belgileńiz», - delingen habarlamada.
Baıqaý týra bir aıǵa sozylady. Onyń nátıjesi boıynsha júldegerler baǵaly syılyqtarǵa ıe bolyp, jeńimpazdardyń jumysy elshiliktiń paraqshasynda jarııalanady.