Reseıdegi qazaqstandyq dıplomattar Jeńis kúni qarsańyndaǵy eske alý sharalaryna qatysty

MÁSKEÝ. QazAqparat – Qazaqstannyń Reseıdegi elshiligi ekinshi dúnıejúzilik soǵystyń aıaqtalǵanyna 78 jyl tolýyna oraı uıymdastyrylǵan eske alý is-sharalaryna qatysty, dep habarlaıdy QazAqparattyń menshikti tilshisi.

Reseıdegi Qazaqstan elshisi Ermek Kósherbaevtyń aıtýynsha, dıplomatııalyq mıssııa ujymy eki óńirge – Rjev jáne Volokolam okrýgine barǵan.

Qazaqstandyq delegatsııanyń sapary Rjev túbinde soǵysqan 100 jáne 101-shi atqyshtar brıgadasynyń qazaqstandyq sarbazdaryna arnalǵan Memorıaldyq keshennen bastaldy. Munda dıplomattar jergilikti ákimshilik ókilderimen birge qaharmandar monýmentine gúl shoqtaryn qoıdy.

Bıyl adamzat tarıhyndaǵy eń qandy urystardyń biri – Rjev shaıqasynyń aıaqtalǵanyna 80 jyl toldy. 1942-1943 jyldary Almaty men Aqtóbede qurylǵan 100 jáne 101-shi atqyshtar brıgadasy Rjev pen Vıazma túbinde, Olenıno men Belyıda erlik kórsetti. Sol kezde jeke quramnyń 80 paıyz qazaqstandyq azamaty qaza tapty. Jalpy, Rjev shebi Máskeýdi qorǵaýda óte mańyzdy ról atqardy.

Sapardyń kelesi baǵyty Rjev aýdanyndaǵy Trýbıno aýyly boldy, onda Keńes soldattary jerlengen. Gúl shoqtaryn qoıý rásiminen keıin Islam qaǵıdattary boıynsha qurban bolǵan sarbazdarǵa duǵa jasaldy. Munan soń Keńes soldatyna arnalǵan Rjev memorıalyna bardy. Bul memorıaldyq keshen 1942-1943 jyldary Rjev túbindegi soǵysta qaza tapqandardyń qurmetine salynǵan. Onyń ortalyq bóligi – 25 metrlik soldat músini.

Eske alý sharalary tústen keıin Volokolam qalalyq okrýginde jalǵasty. Dıplomattar Keńes Odaǵynyń batyry Baýyrjan Momyshulynyń músinine gúl shoqtaryn qoıyp, Nelıdova aýylyndaǵy «Panfılovshy batyrlar» memorıalyna bardy.

Volokolam qalalyq okrýginiń basshysy Mıhaıl Sylka Qazaqstan elshiligi eske alýis-sharalaryna únemi óte belsendi qatysatynyn atap ótti.