Reseıdegi qandastar úshin Qazaqstanǵa áýe saparlary artady

ASTANA. QazAqparat - Reseıdiń shalǵaıdaǵy óńirlerinde turatyn qazaqtar Qazaqstanǵa jıi saparlaýy úshin jańa áýe reısteri ashylmaq, dep habarlaıdy QazAqparat.

Búgin Astanada QR IDM Azamattyq avıatsııa komıtetiniń tóraǵasy Talǵat Lastaev pen reseılik «Angara» áýe kompanııasynyń ókili Andreı Paýtov kezdesti. Kezdesýde  eki el arasynda jańa reıster ashý máseleleri talqylandy.

«2018 jyldyń sáýir aıynan bastap reseılik kompanııa alǵash ret AN-148 tıpindegi áýe kemesimen Krasnoıarsk-Almaty baǵytynda elimizge áýe reısterin bastaýdy, al bolashaqta Irkýtsk-Astana, Irkýtsk-Almaty, Krasnoıarsk-Astana baǵyttaryn ashýdy josparlap otyr. Qazirgi ýaqytta «Angara» áýe kompanııasy Qazaqstanǵa ushýǵa arnalǵan sheteldik tasymaldaýshyny akkredıtatsııalaý rásiminen ótýde», - dep atap ótilgen QR IDM taratqan habarlamada.

Azamattyq avıatsııa komıteti Qazaqstan men Reseıdiń iri qalalaryn baılanystyratyn baǵdarlamany belsendi júzege asyryp, jergilikti áýejaılardyń tranzıttik áleýetin damytatynyn atap ótý qajet.

«Angara» áýe kompanııasynyń ókili Andreı Paýtovtyń pikirinshe, bul baǵyt Irkýtsk oblysy, Sibir jáne Qıyr Shyǵys federaldyq okrýginde turatyn qazaq dıasporasynyń ókilderi men Baıkalǵa barǵysy keletin týrıster tarapynan suranysqa ıe bolady.

Aıta keteıik, «Angara» áýe kompanııasy Shyǵys Sibirdiń negizgi áýe tasymaldaýshylarynyń biri. Ol Irkýtsk oblysy, Sibir jáne Qıyr Shyǵys federaldyq okrýg boıynsha turaqty reısterdi jáne Reseı boıynsha charterlik reısterdi júzege asyrady.