Reseıdegi etnıkalyq qazaqtardyń balalary Qazaqstanǵa saıahattaıdy

NUR-SULTAN. QazAqparat – QR Mádenıet jáne sport mınıstri Dáýren Abaev balalar men jasóspirimder arasyndaǵy ishki týrızm jobalary týraly aıtyp berdi, dep habarlaıdy QazAqparat tilshisi.

«Balalar men jasóspirimder arasynda ishki týrızmdi damytý men nasıhattaý boıynsha jumystar jergilikti atqarý organdarymen birlese júrgizilýde. Mysaly, Almaty oblysynda 300 balany qamtıtyn, taý jáne jaıaý júrý týrızmine arnalǵan «Jońǵarııa» respýblıkalyq týrıadasyn ótkizý josparlanyp otyr», - dedi D. Abaev Úkimet otyrysynda.

Sondaı-aq turǵyndardyń demalysqa jumsaıtyn shyǵynyn azaıtý jáne ishki týrızmdi nasıhattaý maqsatynda Kids Go Free – balalar áýe bıletin sýbsıdııalaý boıynsha memlekettik qoldaý sharasy kúshine endi.

«Bıyl shilde aıynda Aqmola oblysynda Reseı Federatsııasynyń etnıkalyq qazaqtarynan quralǵan 250-den asa mektep oqýshysyna arnalǵan «Aınalaıyn, Atameken!» týryn ótkizý josparlanyp otyr. Jaz aılarynda balalar arheologııasy boıynsha jobalar, «Aýyldaǵy apta», «Summer school» áleýmettik bastamalary júzege asyrylyp, 2000-ǵa jýyq balany qamtý kózdelip otyr», - dedi Dáýren Abaev.

Buǵan deıin Dáýren Abaev balalarǵa arnalǵan mádenı jobalardy tanystyrǵan edi.