Reseıdegi sý qoımalarynan kóp sý jiberilip jatyr – BQO ákimi turǵyndarǵa úndeý joldady

<p>ORAL. KAZINFORM &mdash; Batys Qazaqstan oblysynyń ákimi Narıman Tóreǵalıev óńir turǵyndaryna sý tasqynyna qatysty qalyptasqan jaǵdaı boıynsha úndeý joldady.</p>

Onda óńir basshysy oblysta sý tasqyny qaýpi áli seıilmegenin atap kórsetti.

«Qurmetti batysqazaqstandyqtar! Tasqyn sýdyń saldarynan óńirimizdiń 5 aýdanynda jáne Oral qalasynda birneshe turǵyn úılerdi sý basqan bolatyn. Budan bólek, Oral qalasy mańyndaǵy saıajaılarǵa da sý kirdi. Jalpy oblys boıynsha 7 myńǵa jýyq adam qaýipsiz jerge kóshirildi, onyń 3 myńnan astamy – balalar. Evakýatsııalyq pýnktterde qajetti jaǵdaılar jasalyp jatyr. Sý tasqynynan zardap shekkenderge myńdaǵan erikti kómek kórsetip jatyr. Turǵyndarǵa azyq-túlik, dári-dármek pen kıim-keshekter jetkizilýde. Kezekshilikter uıymdastyrylyp, oqýshy balalarǵa oqý protsesteri onlaın formatta ótip jatyr. Biz óz tarapymyzdan turǵyndardyń qajettilikterin eskerip, barlyq qajetti jaǵdaılardy jasaıtyn bolamyz», - dedi N.Tóreǵalıev.

Ákimniń aıtýynsha, Reseıdiń kórshiles Saratov jáne Orynbor oblystaryndaǵy sý qoımalarynan kóp mólsherde sý jiberilip jatyr. Bul 30 jyl buryn bolǵan jaǵdaıdan da kúrdeli. Atap aıtqanda, Saratov oblysyndaǵy Prıýzen sý qoımasynan Qaraózenge sekýndyna 431 tekshemetr sý túsip jatyr.

Qazirgi ýaqytta sý tasqynynyń ekinshi kezeńi bastaldy. Keshe Reseıdiń Orsk qalasynda damby buzylyp, eldi mekender men turǵyn úıler zardap shekti. Bul Batys Qazaqstan oblysyna da qaýip tóndirýi múmkin. Óıtkeni Orynbordyń Irıkla sý qoımasynan sekýndyna 2 170 tekshe metr sý jiberilip jatyr. Bul sýlar jaqyn ýaqytta Jaıyq ózeni arqyly ótip, Kaspııge bet alady.

Búgin Jaıyqtaǵy sý deńgeıi 7 metrge jýyq kóterildi. Bul qaýipti mólsherge jaqyndaı tústi. Osylaısha, ózen sýy arnasynan tasyp, Oraldaǵy 1-shi, 2-shi, 3-shi saıajaılarǵa sý kirip jatyr. Sondyqtan qala turǵyndarynyń túsinistik tanytý suralady.

Sondaı-aq, Reseıdiń Elek aýdanynyń tusynda ózen sýlarynyń qaýipti deńgeıi 890 sm bolsa, qazirgi ýaqytta 855 santımetrge jetti. Birinshishi, ekinshi, úshinshi saıajaı turǵyndary qala ákimdigi bekitken evakýatsııalyq pýnktterge nemese ózderi qalaǵan qaýipsiz jerlerge kóshýi tıis.

«Búgin Memleket basshysy Qazaqstan halqyna sý tasqyny jaǵdaıy boıynsha úndeý jarııalap, apattan zardap shekken ár turǵyn kómeksiz qalmaıtynyn atap ótti. Sondyqtan biz úshin jerlesterimizdiń qaýipsizdigi birinshi orynda degen bolatyn. Biz sý tasqyny bastalǵannan beri tasqynnyń aldyn alý baǵytyndaǵy jumystardy kúsheıtilgen rejımde atqarýdamyz. Qalaǵa jaqyn Jaıyq ózeniniń kóterilýine baılanysty, onyń irgesin bekitip, qapshyqtarmen qum tósep jáne basqa saqtyq sharalaryn iske asyryp jatyrmyz. Osyndaı qıyn ýaqytta oblys jurtshylyǵy tabıǵı apattan zardap shekken jerlesterimizge jan-jaqty qoldaý kórsetip, aýyzbirshilik tanytyp jatyr. Qazirgi sý tasqyny bolǵan eldi meken turǵyndaryna óńir kásipkerleri, qoǵamdyq birlestikter, bıýdjettik mekemeler, eriktiler jáne qarapaıym oblys turǵyndary qolushyn sozýda. Tótenshe jaǵdaı, kommýnaldyq qyzmet, kúshtik qurylymdar mamandary men eriktilerge, sondaı-aq, jerlesterime kómekteri úshin zor alǵysymdy bildiremin! Osynaý qıyn kezeńde sabyrlyq saqtap, bir-birimizge qoldaý kórsetýdi jalǵastyraıyq! Sondaı-aq, sý tasqyny boıynsha qalyptasqan jaǵdaı boıynsha barsha turǵyndar men BAQ ókilderiniń tek resmı aqparat kózderine senýin suraımyn», - dedi Batys Qazaqstan oblysynyń ákimi.

Eske sala keteıik, budan buryn Batys Qazaqstan oblysynda sýǵa ketken 552 úıdiń 292-si jaramsyz ekendigin jazǵan bolatynbyz.

Sondaı-aq Jaıyq ózeniniń deńgeıi Oral qalasy tusynda 685 santımetrge jetti.

Oral qalasynda 1957 jylǵy jaǵdaı qaıtalanýy múmkin.