Reseıdegi Daǵystan Respýblıkasynyń turǵyny Atyraýǵa 50 myń qap alyp keldi
Ol Daǵystannyń Hasavıýrt qalasynyń mańynda aýylda turady. Atyraý oblysyna deıin 50 qap salynǵan sómkelerdi jetkizý úshin 24 saǵat jol júrgen.
«Týysqandarym áleýmettik jeliden Qazaqstannyń Reseımen shekaralas aımaqtarynda tasqyn sýdan qorǵanys bógetin bekitý úshin qap jetispeıdi degen aqparatty oqypty. Olar bul aqparatty maǵan jetkizdi. Sodan soń baýyrlas elge kómek berý úshin tanystarymnan qap izdeı bastadym. Dosymnyń zat saqtaıtyn qoımasy bar edi. Túngi saǵat 02:00 shamasynda sol qoımadan júk tasıtyn GAZel kóligime 50 qapty tıep, jolǵa shyqtym. Atyraýǵa tezirek jetý úshin túnimen jolda júrdim», -deıdi Omarashab Ahmedov.
Onyń aıtýynsha, týǵan jerindegi tanystary men dostary týǵan jerine oralýyn asyǵa kútip otyr. Endi olardyń Atyraý oblysyna gýmanıtarlyq kómektiń taǵy bir partııasyn jetkizedi.
«Turatyn elimiz bólek bolǵanymen, qıyndyq kezde bir-birimizge qoldaý kórsetýimiz kerek. Maqsatym – týysqan halyqtyń osyndaı qıyndyqtan aman qalýyna úlesimdi qosým», -deıdi Omarashab Ahmedov.
Bizge jetken aqparatqa qaraǵanda, Reseıdegi Astrahan oblysynda turatyn qandastar da gýmanıtarlyq kómek jınap jatyr. Olar jaqynda gýmanıtarlyq júkti Atyraýǵa jiberedi.
Eske sala ketelik, budan buryn Atyraý oblysynda tótenshe jaǵdaı jarııalandy.
Atyraý oblysynyń ákimi Serik Shápkenov turǵyndar ómirine qaýip tónse, aldyn ala habarlanatynyn aıtty.
Keıin Jaıyq ózeniniń sýy Atyraý qalasyna qaı tustan kirýi múmkin ekenin habarlaǵan bolatynbyz.
Sondaı-aq, Atyraý turǵyndary tasqyn sýǵa qarsy bóget turǵyzýǵa judyryqtaı jumyldy.