Reseıde sý astynda qalǵan úıler sany 1,3 myńǵa jetti
15:50, 14 Tamyz 2021
MÁSKEÝ. TASS-QazAqparat – Reseı Federatsııasynyń Kýban qalasynda tolassyz jaýǵan nóser saldarynan sý astynda qalǵan úıler sany 1,3 myńǵa jetti, sondaı-aq 1,6 myń aýlany sý basty. Bul týraly RF TJM Krasnodar ólkesi basqarmasynan málim etti, dep habarlaıdy QazAqparat TASS-qa silteme jasap.
Keshe keshke TJM óńirlik basshylyǵy Krasnodar ólkesinde aýa raıynyń qolaısyzdyǵy saldarynan 352 úıdi, 878 aýlany sý basqanyn málimdedi.
«Osy tsıklon saldarynan 19 eldi mekendegi 1344 jeke úı, 1683 aýlany sý basty», - delingen habarlamada.
Qutqarýshylar bes lagerdegi 989 balany evakýatsııalady. 847 turǵyn, sonyń ishinde 588 bala ýaqytsha ornalastyrý pýnktine jetkizildi. Temrıýk aýdany Starotıtarovsk stansasynda jeke úılerdegi 25 adam evakýatsııalandy.
11 eldi mekende elektr sónip, 108 myń adam jaryqsyz qaldy. Qalpyna keltirý jumystary júrip jatyr.
Tótenshe jaǵdaı rejımi jarııalanǵan mýnıtsıpalıtetter sany altydan 14-ke jetti.