Reseıde sheteldik azamattar úshin arnaıy quqyqtyq rejım engiziledi

MÁSKEÝ. TASS – QazAqparat – Arnaıy quqyqtyq rejım – «Baqylanatyn mekendeý jeri» - Reseıde bolýǵa quqyǵy joq, biraq túrli jaǵdaılarǵa baılanysty, mysaly, koronavırýsqa baılanysty ózin-ózi oqshaýlaý saldarynan elde qalýǵa májbúr bolǵan mıgranttar úshin engiziledi. Bul týraly Reseıdiń ishki ister mınıstrliginiń baspasóz ortalyǵy málim etti, dep habarlaıdy QazAqparat TASS agenttigine silteme jasap.

«Kóshi-qon salasyndaǵy qaýipsizdik pen quqyqtyq tártipti qamtamasyz etý tetiginiń tıimdiligin arttyrýǵa baǵyttalǵan profılaktıkalyq sıpattaǵy sharalardyń biri retinde zańnamaǵa «Baqylanatyn mekendeý jeri» – Arnaıy quqyqtyq rejımin engizý josparlanýda. Ol Reseıde bolýǵa zańdy negizi joq, biraq belgili bir sebeptermen onyń aýmaǵynda júrgen mıgranttarǵa qatysty belgilenedi», - dedi ortalyq ókili.

Іshki ister mınıstrligi jańa quqyqtyq rejım sheteldikterge qatysty qoldanylatynyn túsindirdi, mysaly, jer aýdarý týraly sheshimderdiń oryndalýy toqtatylǵan nemese taǵaıyndalǵan jazalardy oryndaý qajettiligine, sot protsesterine qatysýǵa baılanysty Reseıden ketýi shektelgen shetel azamattaryna qatysty qoldanylady.

«Rospotrebnazordyń belgili bir sanıtarlyq erejelerin, sonyń ishinde ózin-ózi oqshaýlaý rejımin saqtaý týraly nusqaý bergen áleýmettik qaýipti juqpaly aýrýlardan zardap shegetin sheteldikterge qatysty osyndaı rejımdi ornatý máselesi qarastyrylýda», - dep tolyqtyrdy vedomstvo.

ІІM osylaı baqylanatyn sheteldikterge qatysty birqatar shekteýler zańnamalyq túrde engizilýi múmkin ekenin habarlady. Sondaı-aq, Reseı Federatsııasynyń Ákimshilik quqyq buzýshylyq týraly kodeksine sheteldik azamattardyń arnaıy quqyqtyq rejımin buzǵany úshin jaýapkershilik belgileý turǵysynan tıisti ózgerister engizý máselesi qarastyrylýda.

Іshki ister mınıstrliginiń málimetinshe, ótken jyldyń naýryzynan bastap koronavırýs pandemııasy bastalǵan ýaqyttan beri shamamen 1,6 mıllıon mıgrant elde bolý merzimi aıaqtalǵannan keıin Reseıden ketpegen. Qabyldanǵan sharalar 400 myńǵa jýyq adamnyń quqyqtyq mártebesin retteýge múmkindik berdi.