Reseıde Rýnetke qatysty jańa zań kúshine endi

MÁSKEÝ. TASS – QazAqparat – Reseıde ınternettiń reseılik segmentin ǵalamtordyń jahandyq ınfraqurylymynan ajyratqan jaǵdaıda onyń turaqty jumysyn qamtamasyz etý jónindegi zań kúshine endi, dep habarlaıdy «QazAqparat» HAA TASS agenttigine silteme jasap.

Resmı tulǵalar men sarapshylardyń aıtýynsha, jańa zańnyń reseılik ınternetti paıdalanýshylarǵa eshqandaı áseri bolmaıdy, Rýnet álemdik Internet keńistiginiń bir bóligi bolyp qala bermek.

«Zańnyń kúshine enýinen reseılik qoldanýshylar eshqandaı ózgeristi baıqamaıdy, baılanystyń sapasy da nasharlamaıdy», - dep málimdedi RF Tsıfrlyq damý, baılanys jáne buqaralyq kommýnıkatsııalar mınıstrliginiń baspasóz hatshysy Evgenıı Novıkov.

Zańǵa sáıkes, Rýnettiń qalypty jumys isteýine qaýip tóngen jaǵdaıda Reseıdiń Baılanys, aqparattyq tehnologııalar jáne buqaralyq kommýnıkatsııalar salasyn qadaǵalaý jónindegi federaldyq qyzmeti (Roskomnadzor) jalpy kópshilik paıdalanatyn baılanys jelisin óz baqylaýyna alady. Al ondaı qaýiptiń týǵany, baqylaýdy federaldyq qyzmetke tapsyrý týraly úkimet sheshim qabyldaıdy.

Zańnyń qabyldanýy jurtshylyq arasynda qyzý talqylandy. Tipti Qytaıdyń «Altyn qalqany» sııaqty jabyq keńistik qurylady dep ýaıymdaǵandar da boldy.

Federaldyq qyzmettiń basshysy Aleksandr Jarovtyń málimdeýinshe, Reseıde tek qana tyıym salynǵan nárseler buǵattalady, tyıym salynǵan aqparattarǵa ǵana shekteý qoıylady.

Al baılanys mınıstriniń orynbasary Alekseı Volın Qytaıdyń ustanǵan joly Reseıge týra kelmeıtinin jetkizdi. Onyń aıtýynsha, QHR ishki naryǵy Reseıge qaraǵanda áldeqaıda aýqymdy, sondyqtan ekonomıkalyq turǵydan ózin qamtamasyz ete alady. Onyń ústine, Rýnetti paıdalanýshylar 300 mln adamnan asady, ıaǵnı Reseı halqynan eki ese kóp. Al Rýnetti oqshaýlap qoıý Rýnet naryǵyn kem degende eki ese qysqartýmen barabar.