Reseıde revaktsınatsııa kezinde murynǵa tamyzatyn vaktsına qoldanylmaq
16:55, 03 Aqpan 2022
MÁSKEÝ. TASS-QazAqparat – Gamaleıa atyndaǵy ortalyq jasaǵan koronavırýsqa qarsy murynǵa tamyzatyn vaktsına klınıkalyq zertteýler men tirkeýden ótkennen keıin azamattardy qaıta vaktsınalaý kezinde qoldanylady. Bul týraly beısenbi kúni Reseıdiń Densaýlyq saqtaý mınıstrliginiń baspasóz qyzmeti jýrnalısterge málim etti, dep habarlaıdy QazAqparat TASS agenttigine silteme jasap.
«Synaqtar aıaqtalyp, tirkeý kýáligi alynǵannan keıin preparat azamattardy qaıta vaktsınalaýda qoldanylady», - delingen habarlamada.
2021 jyldyń qazanynda Reseı Federatsııasynyń Densaýlyq saqtaý mınıstrligi Gamaleıa atyndaǵy ortalyqqa koronavırýsqa qarsy murynǵa tamyzatyn vaktsınanyń klınıkalyq zertteýleriniń ekinshi fazasyn ótkizýge ruqsat bergen.
Budan buryn Ortalyq basshysy Aleksandr Gıntsbýrg atalǵan vaktsınanyń kádimgi vaktsınany egýden bosatpaıtynyn, onyń tek ınfektsııamen kúres jolyndaǵy taǵy bir qosymshaǵa aınalatynyn aıtyp ótken.
Ǵalymnyń sózinshe, murynǵa tamyzatyn vaktsına jutqynshaq pen muryn qýysynyń qosylǵan jerinde jergilikti ımmýnıtet qalyptastyryp, vırýsty aǵzaǵa kirgizbeýge kómektesetin qosymsha shara bolmaq.