Reseıde mektep oqýshylaryna sabaqta uıaly telefon paıdalanýǵa tyıym salyndy

MÁSKEÝ. QazAqparat - Bıylǵy oqý jylynan bastap reseılik mektep oqýshylaryna sabaqta uıaly telefon paıdalanýǵa tyıym salynady. Bul týraly Búkilreseılik IX ata-analar jınalysynda RF Bilim mınıstri Sergeı Kravtsov málimdedi, dep habarlaıdy QazAqparat.

«Jańa sanıtarlyq erejelerge sáıkes, bıylǵy oqý jylynan bastap sabaq kezinde uıaly telefon paıdalanýǵa tyıym salynǵanyn basa aıtamyn. Sabaqta oqýshylar uıaly telefonǵa emes, sabaqqa nazar aýdarýy tıis», - dedi mınıstr onlaın-konferentsııa barysynda.

«Al eger qandaı da bir tótenshe jaǵdaı bolsa, esińizde bolsyn, biz de sabaq oqyǵanbyz. Bizde uıaly telefon bolǵan joq. Mektepte jaýapty adam bar, tótenshe jaǵdaıda ol ata-analarǵa mindetti túrde telefon soǵyp, aıtady. Muǵalim, synyp jetekshisi bar, úzilis kezinde mektep oqýshylarymen sóılesýge bolady. Biraq sabaqta sanıtarlyq erejelerge sáıkes uıaly telefon paıdalanýǵa bolmaıdy», - dep atap ótti S.Kravtsov.

Ol sondaı-aq uıaly telefon paıdalaný balalardyń densaýlyǵyna keri áser etetinin, muny ata-analar men muǵalimder de eskerýi qajet ekenin aıtty.

Foto: media.rbcdn.ru