Reseıde maımyl sheshegi tirkeldi

MÁSKEÝ. TASS-QazAqparat – Reseıde maımyl sheshegimen tirkelgen naýqas Eýropa elderine saıahattap kelgen. Bul týraly «Rospotrebnadzordyń» baspasóz qyzmeti málim etti, dep habarlaıdy QazAqparat TASS agenttigine silteme jasap.

Vedomstvonyń baspasóz qyzmeti málim etkendeı, patsıentte aýrý jeńil túrde ótip jatyr, ómirine tónip turǵan qaýip joq.

«Naýqas oqshaýlanǵan jáne ınfektsııalyq profıldi emdeý mekemesinde jatyr», - delingen habarlamada.

Sondaı-aq, naýqaspen Reseıde baılanysta bolǵandar sheńberi shekteýli, ol páterde jalǵyz turǵan.

«Barlyq baılanysta bolǵan adamdar der kezinde anyqtalyp, dárigerlerdiń baqylaýyna alyndy. Dıagnoz rastalsa, olarǵa barlyq qajetti medıtsınalyq kómek kórsetiledi. Ýaqtyly epıdemıologııalyq tekserý júrgizilýine baılanysty ınfektsııanyń odan ári taralý múmkindigi toqtatyldy. Jaǵdaı «Rospotrebnadzordyń» qatań baqylaýynda», - delingen habarlamada.

Maımyl sheshegin juqtyrǵan naýqas «Vektor» ortalyǵynyń test júıelerimen anyqtalǵan. RF-da vırýsty anyqtaýǵa arnalǵan reagentter jıyntyǵy jetkilikti ekeni málim etildi.

Sonymen qatar, eldiń densaýlyq saqtaý mınıstrligi óńirlerge maımyl sheshegi boıynsha ádistemelik usynystar jibergen.