Reseıde quıyndy jelden 9 adam qaza taýyp, 70-ke jýyǵy jaraqat aldy

MÁSKEÝ. QazAqparat – Reseıdiń Prıvoljsk federaldy okrýginde kún raıynyń qolaısyzdyǵynan 9 adam qaza taýyp, taǵy 67 adam zardap shekti, dep habarlaıdy QazAqparat TASS-qa silteme jasap.

«Kesheden beri Prıvoljsk federaldy okrýgine qarasty 8 sýbektiniń aýmaǵyna (Tatarstan jáne Marıı El Respýblıkalary, Chývash Respýblıkasy, Nıjnıı Novgorod, Penza, Ýlıanovsk, Kırov jáne Samara oblystary) ekpini 27 m/s-qa deıin jetetin jelmen birge qaýipti meteorologııalyq qubylystar áser etýde. 76 adam zardap shekti, sonyń ishinde 9 adam qaza boldy», - delingen Tótenshe jaǵdaılar mınıstrliginiń málimetinde.

99,5 myń adam jaryqsyz qaldy. Quıyndy jel, sonymen qatar 41 turǵyn úı men 7 áleýmettik nysannyń shatyryna zaqym keltirdi, 550 aǵash qulady. Tabıǵı apattan zardap shekken aımaqtarda vedomstvoaralyq jedel shtabtar jumys isteıdi. TJ saldaryn joıýǵa 758 adam jáne 180 tehnıka jumyldyrylǵan.

»Reseı TJM qutqarýshylary turǵyndarǵa qolaısyz kún raıy saldarymen kúresýge kómektesip jatyr – qulaǵan aǵashtardy alyp tastap, joldardy tazartýda, ataýly kómek kórsetýde«, - dep qosyp ótti TJM-nan.

Gıdrometeorologııa ortalyǵynyń boljamyna sáıkes, tsıklon Tatarstan, Marıı El, Bashqurtstan, Chývashııa Respýblıkalaryna, Samara, Nıjnıı Novgorod, Kırov, Saratov jáne Ýlıanovsk oblystaryna yqpalyn jalǵastyrady. Onda qatty jańbyr jaýyp, jel 28 m/s deıin kúsheıetini kútiledi.

Reseı TJM turǵyndardan tabıǵat aıasyna shyqpaýǵa, sýǵa túspeýge, aǵashtar men eski ǵımarattardan alys júrýge keńes berdi.