Reseıde qoıan-qoltyq urystan ótken halyqaralyq týrnırde QR UQK Shekara qyzmetiniń quramasy ІІ oryndy oljalady

ASTANA. QazAqparat - Reseıdiń Golıtsyn qalasynda Federaldy shekara qyzmetiniń bazasynda qoıan-qoltyq urystan batyr shekarashylardy eske alýǵa arnalǵan HHІ halyqaralyq týrnır bolyp ótti.

Bul týraly QR UQK ShQ baspasóz qyzmetinen habarlady.

Bes kúnge sozylǵan týrnır QR UQK men TMD elderiniń Shekara áskerleri qolbasshylary keńesiniń 2014 jylǵa arnalǵan halyqaralyq is-sharalar josparyna sáıkes ótkizildi.

Atalǵan sport sharasyna RF men TMD elderiniń quqyqqorǵaý, kúsh qurylymdary jáne basqa da vedomstvolarynan quralǵan 28 qurama komanda qatynasty.

Týrnır qorytyndysy boıynsha QR UQK Shekara qyzmetiniń quramasy ІІ oryndy jeńip aldy, aldaryna tek RF Jazany óteý qyzmetiniń komandasyn ǵana jiberdi.

Jeke esep boıynsha aıtar bolsaq, qazaqstandyq shekarashylar 9 salmaq sanaty boıynsha bir altyn, eki kúmis, bir qola medal ıemdendi. Al 55 kelige deıingi salmaq dárejesi boıynsha І oryndy QR UQK Shekara akademııasynyń arnaýly taktıkalyq fakýltetiniń oqytýshysy serjant Berik Shynalıev ıelendi. 90 kelige deıingi salmaqta ІІ oryndy QR UQK ShQ 2020 áskerı bóliminiń «Saryaǵash» ótkizý-baqylaý beketiniń baqylaýshysy serjant Nurbol Tursynbaev enshiledi, al osy atalǵan bólimsheniń aǵa serjanty Rahymjan Sultanov 90 keliden joǵary salmaqta ІІ oryndy jeńip aldy. Al 80 kelige deıingi salmaqta QR UQK ShQ 2029 áskerı bóliminiń serjanty Temirlan Ishanǵalıev ІІІ oryndy qanaǵat tutty.

Qurama komandalar boıynsha esepte TMD-ǵa qatysýshy memleketterdiń shekara vedomstvolarynyń arasynda QR UQK Shekara qyzmetiniń quramasy úsh birdeı birinshi oryndy, tórt birdeı ekinshi oryndy, eki birdeı úshinshi oryndy ıelendi.

Aldaǵy kezde qazaqstandyq shekarashy sportshylar Atyraý qalasynda ótetin «Dınamo» ortalyq keńesiniń chempıonatyna qatysatyn bolady.