Reseıde koronavırýstyń taralý kórsetkishi kóktemge qaraı tómendeýi múmkin

MÁSKEÝ. TASS-QazAqparat – Reseı Federatsııasynda kóktemde koronavırýs aýrýynyń ósýi bolmaıdy. Bul týraly Rospotrebnadzor epıdemıologııa Ortalyq ǵylymı-zertteý ınstıtýty dırektorynyń ǵylymı jumystar jónindegi orynbasary Aleksandr Gorelov aıtty, dep habarlaıdy QazAqparat TASS agenttigine silteme jasap.

«Kúzde ortasha ósý kezeńi boldy, qazir epıdemııalyq protsesti turaqtandyrý kezeńi ótýde, ol ádette eki aıǵa sozylady. Sodan keıin kóktemde de bolatyn turaqty quldyraý kezeńi ótedi. Al kóktemde aýrý deńgeıi dástúrli túrde tómen bolady. Biz mundaı ımmýndyq qabatpen nólge túspeımiz», - dedi ol.

Aldaǵy kúzgi epıdemııalyq maýsym týraly suraqqa jaýap bergen Gorelov «ol tynysh ótpeıdi» dep atap ótti. Onyń aıtýynsha, tumaýdyń kez-kelgen túri bolǵan jaǵdaıda, ınfektsııa adamdar arasynda tarala bastaıdy. «Biz tek tumaýdy baqylaý týraly ǵana aıta alamyz, ol úshin vaktsınalar bar jáne koronavırýsty baqylaýǵa alýǵa úlgeremiz dep úmittenemiz», - dep túsindirdi sarapshy.

Gorelov sonymen qatar qalada aýrýdyń taralý ındeksi 0,7-den az bolǵan jaǵdaıda ǵana koronavırýstyq shekteýlerdi alyp tastaýǵa bolatynyn atap ótti.

Koronavırýs pandemııasy bastalǵaly álemde 102,5 mıllıonnan astam adam aýrýǵa shaldyqqan. 2,2 mıllıonnan astam adam kóz jumǵan. Reseıde koronavırýspen kúres jónindegi federaldy jedel shtabtyń málimeti boıynsha aýrý juqtyrýdyń 3 850 439 jaǵdaıy tirkelgen, 3 300 004 adam saýyǵyp shyqqan, 73 182 naýqas qaıtys bolǵan. Reseı úkimeti eldegi jaǵdaı týraly habarlaý úshin stopkoronavırýs.rf resýrsyn iske qosqan bolatyn.