Reseıde koronavırýstyń órshýine baılanysty BQO-da shekarada karantın kúsheıdi

ORAL. QazAqparat - Batys Qazaqstan oblysynda Reseıde koronavırýstyń órshýine baılanysty shekarada sanıtarlyq-karantındik talaptar kúsheıtildi, dep habarlaıdy QazAqparat tilshisi.

Bul týraly oblys ákimi Ǵalı Esqalıevtiń tóraǵalyq etýimen ótken óńirlik jedel shtab otyrysynda BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaev málim etti.

Onyń aıtýynsha, sońǵy táýlikte Reseıde 85 óńirde 34 325 naýqas tirkelgen.

Sonyń ishinde Batys Qazaqstanmen shektesetin Samara oblysynda - 915, Volgogradta - 382, Orynborda - 399, Saratovta 408 adamnan koronavırýs anyqtaldy.

«Kúni búgin indetke tosqaýyl qoıý maqsatynda shekaradaǵy 4 karantındik-sanıtarlyq bekette 12 epıdemıolog táýlik boıy jumys istep jatyr», dedi M.Aryspaev.

Onyń sózine qaraǵanda, 1 qazannan beri anyqtamasyz ótken 673 jolaýshynyń bireýinen indet tabyldy. Halyqaralyq júk tasymalymen aınalysatyn 1946 júrgizýshi anyqtamasyz ótken. Sonyń ekeýi koronavırýs juqtyrǵan bolyp shyqty.

Eske sala keteıik, budan buryn BQO-da sońǵy aptada koronavırýs juqtyrǵandar sany 10,2 paıyzǵa tómendegenin, 250-den astam naýqastyń statsıonarda emdelip jatqanyn jazǵan bolatynbyz.