Reseıde koronavırýstan kóz jumǵandar sany taǵy da rekordtyq kórsetkishke jetti

MÁSKEÝ. QazAqparat – Reseıde sońǵy táýlikte koronavırýs ınfektsııasynan kóz jumǵandar sany 936 adamǵa jetti. Bul pandemııa kezindegi eń joǵarǵy kórsetkish, dep habarlaıdy QazAqparat menshikti tilshisi.

Seısenbi kúni RF vıtse-premeri Tatıana Golıkova úkimet múshelerimen jınalysta osy jyldyń qyrkúıek aıynda KVI-ge shaldyqqandar sany 31 protsentke jetip, 100 myń adamǵa shaqqanda 88 jaǵdaıdy quraǵanyn habarlaǵan bolatyn.

«Bes aptadaǵy ortasha aptalyq kórsetkish 100 myń turǵynǵa shaqqanda 96,9 adamdy qurady. Bul ótken jylmen salystyrǵanda 3,1 ese kóp», - dedi Tatıana Golıkova.

Sondaı-aq, ol profılaktıka aıasynda jalpy 47,4 mln reseılik vaktsınanyń birinshi komponentin alǵanyn, al 42,2 mln adam tolyqtaı ekpe ektirgenin aıtty. Aýyrǵannan keıin jáne qaıta vaktsına alǵandar sany – 1,9 mln adam.

Ujymdyq ımmýnıtetke jetý úshin taǵy da 35,9 mln adam alǵashqy ekpe alýy tıis. Sońǵy táýlikte Reseıdiń barlyq óńirinde 27 246 adam koronavırýs juqtyrǵan.

Avtory: Narymbek Ismagýlov