Reseıde koronavırýsqa qarsy qaıta vaktsınalaý bastaldy

MÁSKEÝ. TASS-QazAqparat – Reseı óńirlerinde koronavırýs ınfektsııasyna qarsy qaıta vaktsınalaý, sonymen qatar COVID-19-ben aýyryp shyqqandarǵa ekpe salý bastaldy. Bul týraly RF Densaýlyq saqtaý mınıstrliginiń baspasóz qyzmeti jýrnalısterge sársenbi kúni málimdegen, dep habarlaıdy QazAqparat TASS agenttigine silteme jasap.

«Reseıdiń Densaýlyq saqtaý mınıstrligi «COVID-19-ǵa qarsy eresekterdi vaktsınalaýdy júrgizý tártibi» ýaqytsha ádistemelik usynymdaryn bekitti. Óńirlerde revaktsınatsııa jáne aýyryp shyqqandarǵa ekpe salý bastaldy», - delingen habarlamada.

Usynymdarǵa sáıkes, azamattar elde tirkelgen kez kelgen vaktsınalyq preparatty ektire alady. Degenmen birinshi dozany saldyrǵannan keıin naýqasta jaǵymsyz áserler paıda bolsa, onyń qalaýymen, qarsylyqtar bolmaǵan jaǵdaıda, vaktsınany almastyrýǵa múmkindik beriledi.

Atap ótilgendeı, RF-da ujymdyq ımmýnıtet kerekti deńgeıde qalyptaspaıynsha, qaıta vaktsınalaý nemese aýyryp shyqqannan keıin jarty jyl ótken soń ekpe salýǵa keńes beriledi. Bul kezeń «shuǵyl vaktsınalaý» dep atalady. Ujymdyq ımmýnıtettiń maqsatty deńgeıine jetkennen keıin «qalypty vaktsınalaýǵa» kóshý júzege aspaq. Ol josparly túrde jazylyp shyqqannan nemese qaıta vaktsınalaýdan keıin 12 aı óte egýdi kózdeıdi.