Reseıde koronavırýs juqtyrý kórsetkishi eki ese artty

<p>Reseıde kúzgi epıdemıologııalyq maýsym bastalǵannan beri halyqtyń koronavırýs ınfektsııasyn juqtyrý kórsetkishi aıtarlyqtaı óskeni baıqaldy, dep habarlaıdy <a href="Kazinform" target="_blank" rel="noopener">Kazinform.</a></p>

Rospotrebnadzor basshysy Anna Popova Federatsııa keńesiniń úkimet saǵaty aıasynda sóılegen sózinde sońǵy aptada elde koronavırýs juqtyrý kórsetkishiniń artqanyn habarlady. 

«Búginde biz qyrkúıekte bolǵan birinshi tolqynnan joǵary ekinshi tolqyndamyz — ol kóterilip jatyr. Tirkelgen naýqastar sany sońǵy aptada 35-36 myń adamdy qurap otyr, bul ótken aımen salystyrǵanda eki ese kóp. Aýrýǵa shaldyqqandardyń jalpy sany nemese úlesi 30%-dan asyp tur, bul úsh sýbekti — Máskeý, Máskeý oblysy jáne Sankt-Peterbýrg. Aýrýdyń jańa tolqyny bastalyp jatqanyn jáne búkil elge taraıtynyn kórsetip otyr. Munda, negizinen, búginde Reseı Federatsııasynda basym bolyp otyrǵan „Omıkronnyń“ barlyq nusqalary, „Arktýr“ bar. Qalyptasqan jaǵdaı qazirdiń ózinde indettiń basy dep aıtýǵa bolady», — dedi A.Popova.

Onyń aıtýynsha, epıdemııalyq maýsym aldynda RF barlyq sýbektilerinde tumaý jáne kovıdke qarsy aldyn alý sharalary oryndalǵan. Atap ótkende, emhana, jedel járdem, emdeý jáne statsıonarlyq baza ázirlendi. Budan bólek, balabaqsha, mektep jáne joǵarǵy oqý oryndarynda epıdemııaǵa qarsy fıltrler tájirıbesi engizilip, kelýshilerdiń densaýlyq jaǵdaıy turaqty túrde tekserilip jatyr. 

Rospotrebnadzor baspasóz qyzmetiniń habarlamasy boıynsha, 2023 jylǵy 44-shi aptanyń (2023 jylǵy 30 qazan-5 qarasha) qorytyndysyna sáıkes COVID-19 vırýsyn juqtyrýdyń 35 myń jaǵdaıy tirkelgen. Bul ótken apta kórsetkishinen 31 paıyzǵa kóp, biraq byltyrǵy kezeńmen salystyrǵanda 9 paıyzǵa az. 73 sýbektide aýrýǵa shaldyǵý ósimi tirkelgen. 

Ótken aptada 5 042 adam aýrýhanaǵa jatqyzyldy, bul aldaǵy aptamen salystyrǵanda 33,4 paıyzǵa kóp. 22 993 adam saýyǵyp shyqty (ótken aptamen salystyrǵanda 10,8 paıyzǵa kóp). 63 adam qaıtys boldy. 

A.Popovanyń «Rossııa-1» telearnasynyń efırinde habarlaǵanyndaı, búginde koronavırýstyń bir nusqasy «pırollany» juqtyrýdyń 10 oqıǵasy tirkelgen — úsh oqıǵa Sankt-Peterbýrgte, taǵy úsheýi — Máskeýde. Bul rette dárigerler atalǵan nusqanyń aǵymyn baıqamaǵan, degenmen aýrýdyń alǵashqy kúnderi dene temperatýrasynyń kóterilýi men bastyń qatty aýrýy belgileri júredi. 

Eske sala ketsek, álemde COVID-tiń jańa vırýstaryn juqtyrǵandar sany kóbeıgen. 

QR Densaýlyq saqtaý mınıstrliginiń málimetinshe, elde «Omicron»-nyń jańa shtamdary anyqtaldy: tamyz aıynyń ortasynda «Pirola» nusqasyn juqtyrý, al qazannyń basynda — «Eris» nusqasyn juqtyrýdyń alǵashqy jaǵdaıy tirkelgen.