Reseıde qıraǵan bógetten Qazaqstanǵa keler qaýip joq

<p>ASTANA. KAZINFORM — Reseıdiń Orynbor oblysyndaǵy Jaıyq ózeninde bógettiń qıraýynan Qazaqstanǵa keler qaýip joq. Elimizdiń Tótenshe jaǵdaılar mınıstrligi osylaı dep málimdedi. </p>

Munyń aldynda qazaq-orys shekarasyna, atap aıtqanda Qostanaı oblysyna jaqyn mańda Jaıyq ózeniniń reseılik bóliginde tótenshe jaǵdaı bolǵany habarlanǵan. 

Reseı Federatsııasy TJM daǵdarys jaǵdaılaryn basqarý ortalyǵy jedel kezekshisiniń málimetinshe, Orynbor oblysy Orsk qalasynyń mańynda Jaıyq ózeniniń qorǵanysh bógeti jartylaı qıraǵan.

Talqandalǵan jer bógettiń 870-shi sm belgisinde.

Eni — 2 m, bıiktigi — 1 m.

Orsk qalasynyń eń jaqyn eldi mekenderine ǵana qaýip tónip tur, Qazaqstanǵa sý kelmeıdi.

Jedel qyzmetterdiń aıtýynsha, sý jaıylatyn aýmaqta 4 myńǵa jýyq turǵyn úı bar. Ol úılerde 10 myńǵa deıin adam turýy múmkin. Halyq jedel kóshirile bastady. 

«Bul bóget kóktemgi kezeńde tasqyn sýdy bógep, ustap turýǵa arnalǵan. Qazaqstanǵa, onyń ishinde Batys Qazaqstan oblysyna eshqandaı qater tóndirmeıdi. Jaǵdaı baqylaýda» deıdi TJM baspasóz qyzmetinen.

Eske sala keteıik, kóktemgi sý tasqyny saldarynan Reseıdiń 36 aımaǵynda eki myńǵa jýyq turǵyn úı sý astynda qaldy.

Eldiń 36 aımaǵynda 1970-ten astam turǵyn úı, 10 myńnan astam saıajaı ýchaskeleri, 190 tómen sý kópirleri jáne 120 jol ýchaskeleri sý astynda qaldy.

Sý basý boıynsha Prıvoljsk federaldy okrýginde qıyn jaǵdaı baıqalady, birqatar sýbektide joǵary daıyndyq jáne Orynbor oblysynda tótenshe jaǵdaı rejımi engizildi.