Reseıde qazaqstandyq stýdent Tomırıs Baısafanyń ólimine qatysty is sotta qaralady

MÁSKEÝ. QazAqparat - Qazaqstandyq stýdent Tomırıs Baısafany óltirdi dep aıyptalǵan Mýrtazalı Medjıdovke qatysty qylmystyq is Máskeýdiń Nıkýlın aýdandyq sotynda qaralady, dep habarlaıdy QazAqparattyń menshikti tilshisi.

Marqumnyń anasy Janna Ahmetovanyń aıtýynsha, qylmystyq is materıaldary sotqa berilgen, bastapqy tyńdaý 23 naýryzda ótedi.

«Biz bul týraly búgin ǵana bildik. Negizinde Nıkýlın aýdandyq sotynda eki tarap ta qashyqtan qatysa alatyndaı tehnıkalyq jaǵdaıy joq», - deıdi ol.

Endi ol aldaǵy sot otyrysyna qatysa almaıdy, óıtkeni koronavırýsqa qatysty shekteý sharalaryna baılanysty ol sotqa bara almaıdy. Sondyqtan sot otyrysyna zardap shekken taraptyń advokaty qatysýy tıis.

«Aıyptalýshy sotty alqabıler qatysýymen ótkizý týraly ótinish bildirdi. Biraq biz alqabıler sotyna qarsymyz, óıtkeni aıyptalýshy tarap qatysýshylardyń quramyn anyqtaı alady, al biz olardyń quzyrettilik dárejesin de bilmeımiz», - deıdi Janna Ahmetova.

Sondaı-aq, Ahmetova tergeý barysynda aıyptalýshy birneshe ret aıǵaqty ózgertkenin, tergeý is-sharalarynyń nátıjelerinen ara-tura bas tartqanyn, mundaı áreketter tergeý men sotqa materıaldardy daıyndaý qarqynyn keshiktirgendigin aıtty.

Máskeý sottary portalynyń habarlaýynsha, qylmystyq is boıynsha aldyn ala sot otyrysy sýdıa Konstantın Dýbkovtyń tóraǵalyǵymen seısenbide ótedi. Sottalýshy M. Medjıdov Reseı Federatsııasy Qylmystyq kodeksiniń 105-baby, 1-bóligi boıynsha («Kisi óltirý») qylmys jasady dep aıyptaldy.

Reseı Federatsııasynyń Qylmystyq is júrgizý kodeksiniń erejelerine sáıkes aldyn ala tyńdaýdy sýdıa jalǵyz ózi taraptardyń qatysýymen jabyq sot otyrysynda ótkizedi jáne máseleni sheshý alqabılerdiń qatysýymen júzege asyrylady.