Reseıde izdeýde bolǵan eki kólik Shyǵys Qazaqstannan tabyldy

ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri Reseıde izdeýde bolǵan eki kólikti anyqtady, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, 11-17 qazan aralyǵynda óńir aýmaǵynda qylmysqa qarsy kúrestiń birlesken sharalarynyń memleketaralyq baǵdarlamasy sheńberinde arnaıy jedel aldyn alý sharasy júrgizilip jatyr.

Mundaǵy maqsat – urlyqty ashý jáne avtokólikti aıdap áketýmen aınalysatyn halyqaralyq qylmystyq toptardyń jolyn kesý.

«Sharanyń eki kúninde kólikti aıdap áketýdiń 3 faktisi tirkeldi. Onyń ishinde buryn jasalǵan 2 qylmys ashylǵan. Barlyq ister boıynsha sotqa deıingi tergeý amaldary júrgizilýde», - dep habarlady vedomstvo ókilderi.

Budan bólek, tártip saqshylary urlanǵan avtokólikter men qosalqy bólshekterdi ótkizý oryndaryn tekserip jatyr.

Sonyń nátıjesinde Reseı Federatsııasynda izdeýde bolǵan 2 avtomashına anyqtaldy.

Atalǵan kólikter aıyppul turaǵyna qoıylyp, tıisti saraptamalar taǵaıyndaldy.