Reseıde Esil men Tobyldaǵy sý deńgeıi shekti deńgeıden asyp ketti
Túmen oblysynda bógetterdiń jarylýy nemese sol arqyly sý kóleminiń artý qaýpi artyp keledi. Qazan jáne Esil aýdandarynyń birqatar eldi mekenderinde shuǵyl evakýatsııa júrgizilip jatyr.
Túmen oblysy bıliginiń málimetinshe, Esil ózenindegi sýdyń naqty deńgeıi 33-ten 76 sm-ge deıin kóterilgen. Qazaqstanmen shekaradaǵy Ilınka aýylynda Esil deńgeıi 2017 jyldaǵy tarıhı maksımýmnan 49 sm-ge asyp, 884 sm-ge jetti.
Túmen oblysynyń gýbernatory Aleksandr Moor turǵyndarǵa arnaǵan vıdeoúndeýinde Rosgıdromettiń jańartylǵan boljamy boıynsha Esil ózenindegi sýdyń kóterilýi sáýir aıynyń basyndaǵy aqparatpen salystyrǵanda aıtarlyqtaı joǵary bolatynyn aıtty. Osyǵan baılanysty sý basý qaýpi joǵary eldi mekenderdiń sany artty.
«Sý deńgeıi áli de artady dep jatyr. Bógetterdiń buzylýy nemese tolyp ketý yqtımaldyǵy artyp keledi. Sondyqtan biz turǵyndardy shuǵyl evakýatsııalaýdy bastap jatyrmyz. Bizdiń mamandar aldyn ala sý qaýpi bar aımaqtardaǵy barlyq úıdi aralap shyqty. Qaýipti bárińiz bilip otyrsyzdar. Baǵaly zattaryńyzdy jınap, dereý qaýipsiz jerge – týystaryńyzǵa nemese ýaqytsha evakýatsııa ortalyqtaryna baryńyzdar. Ýaqytsha ornalastyrý ortalyqtarynda sizderge qajettiniń barlyǵyn beremiz. Jaǵdaı óte aýyr», - dedi Aleksandr Moor halyqqa jasaǵan úndeýinde.
Qorǵan oblysynda Tobyl ózenindegi sý tasqynyna baılanysty qıyn jaǵdaı qalyptasyp otyr. Qorǵan oblystyq Tótenshe jaǵdaılar departamentiniń málimetinshe, alty mýnıtsıpalıtette, 25 eldi mekende, 669 turǵyn úı men 2376 saıajaıda, sýy tómen 5 kópir men 9 jol ýchaskesin sý basqan.
Ártúrli eldi mekenderde 13 567 adam evakýatsııalandy, syıymdylyǵy 5 myńnan astam adamdy quraıtyn 16 ýaqytsha ornalastyrý pýnkti ashyldy. Onda 900-den astam adam ornalastyrylǵan. Qorǵanda bógettiń jotasy 11-11,5 metrge deıin ulǵaıtyldy. Bul sýdyń boljamdy kóterilý deńgeıine shamamen 2 metrlik qor bolyp sanalady.
Eń aýyr sý tasqyny Batys Qazaqstan oblysymen shekaralas Elek aýylynda boldy. Sáýirdiń 17-si kúni tańerteń aýyl mańyndaǵy sý deńgeıi 918 sm boldy. Buǵan deıin bul jerge qosymsha qutqarý kúshteri jiberilgen bolatyn. Nátıjesinde tasqynǵa qarsy qurylymdardy aldyn ala nyǵaıtyp, uzyndyǵy bir shaqyrymǵa jýyq sý toltyratyn bóget ornatýǵa múmkindik týdy.
Orynbor oblysy úkimeti baspasóz qyzmetiniń habarlaýynsha, Orynborda 11200 sharýashylyq ýchaskeleri men 6527 sharýashylyqty, onyń ishinde 55 kópqabatty úıdi sý basqan. Oblys ortalyǵynyń aınalasyndaǵy jańa aýmaqtardy sý basý qaýpi bar, turǵyndarǵa tez arada úılerinen ketý usynyldy.