Reseıde Ekinshi dúnıejúzilik soǵysqa qatysqan qazaq jaýyngeriniń súıegi tabyldy

NUR-SULTAN. QazAqparat - 16 jeltoqsanda Reseıdiń Lenıngrad oblysy, Lıýban qalasyndaǵy «TIGODA 47» jedel-izdestirý toby Ekinshi dúnıejúzilik soǵys kezinde qaza tapqan Qyzyl Armııanyń 15 jaýyngeriniń súıekterin tapqan. Súıek qaldyqtarynyń janynan jaýyngerlerdiń jeke zattary, jarylǵysh snarıad, oq-dárilermen medalondar alynǵan. Atalǵan medalonnyń biri qazaq soldaty Ahan Maqataevqa tıesili ekeni anyqtalǵan. Bul týraly QazAqparat «Atamnyń amanaty» qoǵamdyq birlestigine silteme jasap habarlaıdy.

Aıta keterligi, tabylǵan jaýyngerler súıegi týraly jergilikti gazetter de jazǵan.

Maqaladan bólek áleýmettik jelide de aqparattar taraǵan. «Biz Mahaevtiń (tegi durys bolmaýy múmkin, oqylýy qıyn) týystaryn jáne onymen birge soǵysqa qatysýy múmkin sarbazdar týraly aqparatty izdestirýdemiz», - dep eriktilerdiń biri Konstantın Grachev «VK» áleýmettik jelisine jazǵan. Ol «Atamnyń amanaty» birlestigine de ótinish qaldyrǵan eken.

Buny kórgen qoǵamdyq birlestiktiń belsendisi Kúlıan Nurmuhambetova izdeý sharalaryna kirisken.

«Jumys barysynda Mahaev Ahat nemese Ahan emes, Semeı oblysynyń týmasy Maqataev Ahan ekeni birden anyqtaldy. Keshe, 22 jeltoqsan kúni Qazaqstan ýaqyty boıynsha túngi 23.00-den kete taldaý nátıjesi belgili bolyp, Kúlıan Nurmuhambetovanyń nusqasyn ekspertıza rastady. Osylaısha jaýynger qazaq babamyz bolyp shyqty»—, delingen «Atamnyń amanaty» uıymynyń baspasóz qyzmeti.

«Men anyqtadym. Taǵy bir qazaq jaýynger otbasyna qaıta oralady. Rastaldy!», - dep jazǵan Kúlán Nurmuhametova.

Jaýynger Ahan Maqataevtyń týysqandary da tabylǵan.

Avtory: Rıza Ysqaq