Reseıde bir táýlikte eki ret jer silkindi

ChELıABІ. QazAqparat - Búgin kúndiz Reseı Federatsııasynyń Chelıabi oblysyna qarasty Katav-Ivanovsk aýdanynda qarqyndylyǵy 4,6 baldyq jerasty dúmpýi qaıtalandy. Buǵan deıin dál osy jerde sársenbige qaraǵan túni jer silkinisi tirkelgen. Bul týraly óńirdiń qoǵamdyq qaýipsizdigi jónindegi mınıstri Evgenıı Savchenko málim etti, dep habarlaıdy TASS agenttigi.

Alǵashqy 5,6 magnıtýdaly jer asty dúmpýi 03:58-de (Máskeý ýaqytymen 01:58) tirkelgen. Zardap shekkender jaıynda ázirge málimet joq.

«RǴA-nyń federaldyq Biryńǵaı geofızıkalyq qyzmetiniń málimetterine sáıkes, Katav-Ivanov aýdanynda saǵat 12:27-de (Máskeý ýaqytymen 10:27) 4,6 baldyq seısmıkalyq belsendilik tirkeldi. Tereńdigi - 10 shaqyrym. Zardap shekkender týraly aqparat joq», - dedi mınıstr.

Mınıstrliktiń málimetinshe, alǵashqy dúmpýdiń oshaǵy Katav-Ivanov aýdanyna qarasty Orlovka eldi mekeninen 1,5 shaqyrym jerde ornalasqan. Tereńdigi - dál solaı 10 shaqyrym. Savchenko sársenbige qaraǵan túni bolǵan jer silkinisi tehnogendik emes, tabıǵı sıpatqa ıe ekenin aıtyp ketti.