Reseıde áskerı An-26 ushaǵy apatqa ushyrady

MÁSKEÝ. TASS-QazAqparat – Reseıdiń áýe-ǵaryshtyq kúshteriniń An-26 ushaǵy Voronej oblysynda apatqa ushyrady, ekıpaj tolyǵymen qaza tapty. Bul týraly jýrnalısterge Batys áskerı okrýginiń baspasóz qyzmeti málim etti, dep habarlaıdy QazAqparat TASS agenttigine silteme jasap.

«24 aqpan kúni Voronej oblysynda áskerı múlikti tasymaldaý kezinde Reseıdiń Áýe-ǵarysh kúshteriniń An-26 ushaǵy apatqa ushyrady. Ekıpaj qaza tapty. Jerde esh ǵımaratqa zaqym kelmedi. Aldyn ala berilgen aqparat boıynsha, tehnıka isten shyqqan», - dep habarlady baspasóz qyzmeti.

Okrýg aqparatyna saı, apat saldaryn joıý men onyń sebebin anyqtaý maqsatynda Áýe-ǵarysh kúshteriniń komıssııasy oqıǵa ornyna jóneltildi.

An-26 – keńestik, keıinirek Reseılik kóp maqsatty ushaq. Ol OKB-153 tájirıbelik-konstrýktorlyq bıýrosynda (keıin – O.K. Antonov atyndaǵy tájirıbelik-konstrýktorlyq bıýrosy) 1960 jyldary jasalǵan. Jańa nusqasynyń aldyńǵyǵa qaraǵanda júk salatyn lıýgi úlken, ushý massasy aýyr, sonymen qatar ıllıýmınatorlary bar.

Ushaq birinshi ret 1969 jyly 21 mamyrda ushyrylǵan. Ekıpajdy synaýshy ushqysh ıÝrıı Ketov basqarǵan. 1975 jyly 26 mamyrda KSRO Áskerı-áýe kúshterine qabyldandy.

Ushaq 1969-1986 jyldary Kıev pen Ýlan-Ýde qalalaryndaǵy avıatsııalyq zaýyttarda óndirilip otyrǵan. Barlyǵy 1 398 ushaq qurastyrylyp, qazirgi kezde júzdegen ushaq qoldanysta. Ondaǵan jetildirilgen túrleri bar.