Reseıde abaqtydan bes adam qashyp ketti

NUR-SULTAN. TASS-QazAqparat – Búgin túnde Reseı Federatsııasynyń Istra qalasynda ýaqytsha qamaý ızolıatorynan bes adam qashyp ketti. Bul týraly QazAqparat TASS agenttigine silteme jasap habarlaıdy.

Quqyq qorǵaý organdaryndaǵy málimet berýshiniń aıtýynsha, qashqyndardyń biri «Mıasnaıa ımperııa» kompanııasynyń qojaıyny Vladımır Marýgovtyń ólimine aıyptalǵan Aleksandr Mavrıdı. Qashyp ketkender arasynda Ivan Tsýrkaný, Aleksandr Býtnarý, Denıs Grozavý jáne Nıkolaı Teterıa esimderi bar.

Málimet berýshiniń aıtýynsha, aıyptalýshylar tutqyndaý kamerasynda tamaq beriletin tartpany syndyryp, qulypty ashqan soń, artqy esikten shyǵyp qashyp ketken. Polıtseıler zardap shekpegen, qashqyndardyń qolynda qarý bolmaǵan.

Máskeý oblysy prokýratýrasynyń ókili Natalııa Grıgorevanyń aıtýynsha, tekserý barysynda Istra qalalyq prokýratýrasy túrmeden qashýdyń sebepteri men mán-jaılaryn anyqtap, sondaı-aq jaýapty laýazymdy tulǵalardyń áreketine baǵa berilmek.