Reseıde 27 myń volt toq soqqan er adam tiri qaldy
Volgograd oblysy Densaýlyq saqtaý mınıstrligi baspasóz qyzmetiniń habarlaýynsha, kúıik ortalyǵyndaǵy dárigerler men medbıkeler onyń ómiri úshin birneshe aı boıy kúresken. Qaıǵyly oqıǵa 2024 jyldyń shilde aıynyń basynda bolǵan.
Saratov oblysynyń qyryq jastaǵy turǵyny Volgogradtaǵy qurylys alańynda aýyr jaraqat aldy: metall konstrýktsııalaryn túsirý kezinde er adamdy toq soqty.
- Júk kólikteri keldi, baspaldaq marshtaryn sheship, symarqandardy berý kerek boldy. Men symarqandy alyp edim, ol kerneýli bolǵan eken. Qatty toq soǵyp, jerge quladym», – dedi naýqas.
Ol dereý memlekettik densaýlyq saqtaý mekemesiniń jansaqtaý bólimine jetkizildi. Osydan keıin kóptegen kúıik shalǵan er adam mamandandyrylǵan medıtsınalyq kómek alý úshin «GKBSMP 25» mekemesine qarasty qaladaǵy jalǵyz kúıik shalý ortalyǵyna jatqyzyldy.
Emdeýshi dáriger kúıik hırýrgy Igor Gýrınovtyń aıtýynsha, naýqas shamamen 27 myń volt toq soqqannan keıin elektr jaraqatymen óte aýyr jaǵdaıǵa tústi.
«Toq basynan ishki múshelerine ótip, aıaǵynan bir-aq shyqqan. Mundaı jaraqat alǵan adam kóp jaǵdaıda tiri qalmaıtyn edi. Tekserý qorytyndysy, sonyń ishinde KT boıynsha, ishki aǵzalary – júrek, búırek, ókpe, baýyryna zaqym kelip, eki aıaǵyn qatty kúıik shalǵan. Kombýstıologııalyq, reanımatsııalyq brıgadalarynyń keremet kúsh-jigeriniń arqasynda naýqastyń janyn saqtap qaldyq, biraq bastapqyda ony qutqara almaımyz dep oıladyq. Alaıda, biz moıyǵan joqpyz, naýqastyń ómiri úshin kúres jalǵasty», - dep baıandady kombýstıologııa (kúıik) bóliminiń meńgerýshisi Valerıı Tatarchevskıı.
Naýqas bólimshede 40 táýlik jatty. Osy ýaqyt ishinde oǵan birneshe kúrdeli ota jasaldy. Onyń ishinde plastıkalyq jáne rekonstrýktıvtik otalar bar. Shilde aıynyń sońyna qaraı dárigerler negizgi qajetti sharalardy aıaqtap, naýqas qalpyna kele bastady. Qazir onyń ómirine qaýip tónip turǵan joq. Ol úıine shyǵaryldy.