Reseı telearnalaryn sot úkimimen ǵana shekteı alamyz - Darhan Qydyráli

ASTANA. QazAqparat - QR Aqparat jáne qoǵamdyq damý mınıstri Darhan Qydyráli Qazaqstanda reseılik telearnalar sottyń sheshimimen buǵattalatynyn aıtty, dep habarlaıdy QazAqparat tilshisi.

Búgin Májiliste ótken baspasóz máslıhatynda tilshiler mınıstrden Qazaqstannyń aqparattyq qaýipsizdigin qorǵaý jáne Reseı telearnalaryna shekteý qoıý jaıynda surady.

«Árıne, aqparattyq qaýipsizdik bizdiń basym baǵyttarymyzdyń biri. Biraq biz sottyń úkimimen ǵana shekteı alamyz. Osyǵan baılanysty azamattarymyzdyń shaǵymy men sot úkimi bolsa, biz ony oryndaımyz. Zań buzý derekteri tirkelse, osy oraıda sottyń sheshimi bolsa, onda bul sheshim oryndalady. Qazir jalpy monıtorıng júrgizip otyrmyz. Buǵan qatysty kóptegen másele Syrtqy ister mınıstrliginiń quzyretinde», - dedi D. Qydyráli.

Vedomstvo basshysy Qazaqstan azamattarynyń durys aqparat alýyna erekshe nazar aýdarylyp otyrǵanyn aıtty.

«Sondyqtan bul máseleni pysyqtap jatyrmyz. Jańa aıttym, bul másele Syrtqy ister mınıstrligi men sottyń quzyretinde. Bizdiń mınıstrlik óz betinshe ondaı shekteýmen aınalyspaıdy. Jalpy, azamattardyń pikirin biz qazir kórip otyrmyz, monıtorıng júrgizilip jatyr. Atap aıtqanda, bul máselesi boıynsha sottyń sheshimi bolsa, qarastyramyz», - dedi mınıstr.