Reseı tarapymen ótken kólissózder mazmundy jáne nátıjeli boldy - Muhtar Tileýberdi
Qazaqstan Premer-Mınıstriniń orynbasary – Syrtqy ister mınıstri M.Tileýberdi BAQ ókilderi aldynda Reseı Federatsııasynyń Syrtqy ister mınıstri S.Lavrovtyń jumys saparynyń qorytyndylaryn málim etti.
«Búgingi reseılik tarappen bolǵan kelissózderimiz ádettegideı óte mazmundy jáne nátıjeli boldy.
Biz kóptegen máselelerdi, sonyń ishinde saıası, saýda-ekonomıkalyq jáne mádenı-gýmanıtarlyq salalardaǵy Qazaqstan-Reseı yntymaqtastyǵynyń jaǵdaıy men perspektıvalaryn talqylap, halyqaralyq kún tártibindegi birqatar máseleler boıynsha pikir almastyq.
Árıne, Ortalyq Azııadaǵy, Ońtústik Kavkaz ben Taıaý Shyǵystaǵy turaqtylyq pen qaýipsizdikti qamtamasyz etý sııaqty mańyzdy máseleler nazarymyzdan tys qalmady», - dedi mınıstr.
Vedomstvo basshysy reseılik tarappen ótken kelissózde aımaqtyq jáne jahandyq qaýipsizdiktiń kóptegen problemalaryna, ásirese saıası dıalogta senimdilikti arttyrý nemese nyǵaıtý turǵysynan eki taraptyń kózqarasy ortaq ekeni aıtylǵanyn jetkizdi.
«Asa joǵary jáne joǵarǵy deńgeıdegi halyqaralyq is-sharalar kestesine, atap aıtqanda, memleket basshylarynyń ekijaqty jáne kópjaqty is-sharalarǵa qatysýyna erekshe nazar aýdaryldy. Atap aıtqanda, shekara yntymaqtastyǵynyń ekijaqty saýda aınalymy shamamen 70 paıyzyn quraıtyn Qazaqstan men Reseı arasyndaǵy qatynastardaǵy mańyzdy róldi eskere otyryp, biz Qazaqstan men Reseıdiń XVII aımaqaralyq yntymaqtastyq forýmyna daıyndyqty pysyqtap jatyrmyz. Esterińizde bolsa, bul shara pandemııaǵa baılanysty keıinge qaldyrylǵan edi jáne bıyl Kókshetaý qalasynda josparlanǵan. Eki eldiń aımaqtarynyń aldynda turǵan ózekti máseleler osy forýmda memleket basshylarynyń qatysýymen qaralady degen oıdamyz», - dedi Muhtar Tileýberdi.