Reseı T-72 tankisiniń qosalqy bólshekterin Qazaqstanǵa jetkizedi

ASTANA. QazAqparat - «Ýralvagonzavod» (ÝVZ, «Rosteh» memlekettik korporatsııasyna kiredi) ǵylymı-óndiristik korporatsııasy Qazaqstanǵa T-72 tankisiniń qosalqy bólshekterin jetkizýdi bastaıdy, dep habarlady beısenbi kúni ÝVZ baspasóz qyzmeti. Qajetti kelisimshartqa «Armııa-2017» forýmynda qol qoıyldy, dep habarlaıdy reseılik TASS agenttigi.

«Armııa-2017» forýmynda ÝVZ korporatsııasy úshin belsendi kelissózdik protsester júrgizilýde. Sonyń ishinde eń mańyzdysy - «Semeı Injınırıng» AQ men «Ýralvagonzavod» ǵylymı-óndiristik korporatsııasy» AQ arasynda Qazaqstan Respýblıkasynyń qarý-jaraǵyna kiretin T-72 tankisi úshin qosalqy bólshekterdi jetkizý týraly kelisimshartqa qol qoıǵany», - dep habarlady ÝVZ.

Baspasóz qyzmetiniń deregi boıynsha, qazaqstandyq seriktester el aýmaǵynda brondy tehnıka jóndeý óndirisin qurýǵa nıetti ekendigin málimdegen.

Korporatsııanyń bas dırektory Aleksandr Potapovtyń habarlaýynsha, Qazaqstannyń mashına parki negizinen ÝVZ óndirgen arnaıy tehnıkalardan quralǵan.

«ÝVZ ıntegratsııalanǵan qurylymynyń quramyna brondy tehnıkanyń ómirlik kezeńin uzartýda kópjyldyq tájirıbesi men kásibıligi bar brondy tanki jóndeý zaýyttary kiredi», - dep keltiredi onyń sózin baspasóz  qyzmeti.