Reseı shekteýiniń kesirinen qazaqstandyq kómir óndirýshiler shyǵynǵa batty - mınıstrlik

NUR-SULTAN. QazAqparat - Saýda jáne ıntegratsııa mınıstrligi Reseı arqyly Ýkraınaǵa eksporttalatyn taýarlar shekteýine baılanysty Qazaqstan Respýblıkasy men Reseı Federatsııasy arasyndaǵy kelissóz týraly aqparat taratty. Bul jóninde mınıstrliktiń baspasóz qyzmetine silteme jasap QazAqparat habarlaıdy.

«Reseı Federatsııasynyń birqatar qazaqstandyq taýar tranzıtine tyıym salýy taýarlar tranzıtiniń bostandyǵyn shekteı otyryp, Eýrazııalyq ekonomıkalyq odaq týraly sharttyń negizgi qaǵıdattarynyń bedelin túsiredi. Reseıdiń tranzıtti shekteýi Qazaqstannyń kómir ónerkásibiniń ekonomıkalyq ahýalyna keri áser etedi. Aldyn ala esep boıynsha, kómir jetkizýdiń qysqarýynan qazaqstandyq kómirshilerdiń aı saıynǵy shyǵyny 11 mln AQSh dollarynan asty» delingen habarlamada.

Shildede qazaqstandyq tarap RF aýmaǵy arqyly Ýkraınaǵa 103,5 myń tonna kólemindegi tranzıt boıynsha jospardy baıandaǵan. Reseı tarapy 60,2 myń tonna kóleminde kvotany maquldaǵan. Tamyzda 240,8 myń tonna suratylǵan, 86,5 myń tonna maquldanǵan. Qyrkúıekte ótinim boıynsha 189,7 myń tonna bolsa, reseılik tarap 86,5 myń tonnaǵa deıin qysqartqan. Qazanda 191,9 myń tonnaǵa ótinim jasalsa, RF 86,5 myń tonnany maquldaǵan.

Bul rette tipti osy tómendetilgen kólemniń kesh alynýy ýkraınalyq satyp alýshylardyń qazaqstandyq taýardan bas tartýyna alyp keldi.

Kelisimshartta kómirdi jóneltý stantsııalarynan satyp alý týraly satyp alýshylardyń mindetteri jıi kelisiledi. Kelisilgen tranzıttiń sany týraly aqparattyń kesh berilýi aldyn ala josparlaýǵa múmkindik bermeıdi. Bul jetkizý merzimin buzyp, kelisimsharttan bas tartýǵa ákep soqty.

«Odan bólek, vagondardy Reseı temir joldarynyń negizsiz toqtatý faktileri oryn alǵan. Mysaly, shildede «ArselorMıttal Temirtaý» AQ 80,4 myń tonna tranzıtke ótinim bergen. Reseılik tarap 55,2 myń tonna tranzıt kólemine kelisim bergen, alaıda keshirek bul kólem úsh ese (!!!) azaıtylǵan jáne 13,6 myń tonnany qurǵan. Saldarynan 189 vagondy «ıesiz» sıpatymen Reseı-Ýkraına shekarasy mańynda RTD AAQ toqtatqan. Osylaısha, Qazaqstan ýkraınalyq áriptesterine tek shilde-qyrkúıekte ǵana 340 myń tonnaǵa jýyq taýardy jetkizbegen» deıdi mınıstrlik.

Sonymen qatar, QR Saýda jáne ıntegratsııa mınıstri Baqyt Sultanov aıtqandaı, «usynylǵan mólsher qazaqstandyq eksporttaýshylardyń suranysyn tolyq kólemde jappaıdy».

«Qazaqstandyq eksporttaýshylar qarashaǵa RTD Ýkraınaǵa 200 myń tonnadan astam (204.61 myń tonna) tranzıtke ótinim berdi. Reseı tarapy bir jaqty tártippen eksportymyzdy shektep otyr, bizdiń oıymyzsha, bul - kedergi» - dep atap ótti QR SIM basshysy.

«Biz ekijaqty formatta sııaqty, sondaı-aq EAEO alańynda Reseı tarapymen kelissózdi jalǵastyramyz. Eýrazııalyq ekonomıkalyq odaq barlyq qatysýshylarǵa teń quqyly shartqa kepildik beredi. Onyń ishinde úshinshi elderge bizdiń taýarlardyń erkin tranzıtin qamtamasyz etý de bar. EAEO boıynsha áriptesterimizdiń is-áreketi basqa eldermen ekonomıkalyq baılanystarǵa bóget bolmaýy tıis», - deıdi Baqyt Sultanov.

Shekteýdi joıý máselesi Qazaqstan-Reseı úkimetaralyq komıssııasynyń sheginde qaraldy, ol 15-16 qazanda Nur-Sultan qalasynda ótti.

Búgingi kelissóz nátıjesinde Qazaqstan tarapy tranzıttiń ruqsat etilgen kólemin aıyna 140 myń tonnaǵa deıin ulǵaıtýǵa múmkindik aldy.