Reseı sanktsııalaryna baılanysty Qazaqstanda kásipkerlerdiń máselelerine arnalǵan jedel shtab quryldy

NUR-SULTAN. QazAqparat – Reseı Federatsııasyna salynyp jatqan túrli sanktsııalarǵa baılanysty elimizde kásipkerlerge arnalǵan jedel shtab quryldy. Bul týraly «Atameken» ulttyq kásipkerler palatasynyń Nur-Sultan qalasy boıynsha fılıaly dırektorynyń mindetin atqarýshy Beısen Jolboldıev málim etti, dep habarlaıdy QazAqparat tilshisi.

«Reseı Federatsııasyna salynyp jatqan birqatar sanktsııalardyń Qazaqstan ekonomıkasyna áserine baılanysty kásipkerlerge arnalǵan jedel shtab quryldy. «Atameken» ulttyq kásipkerler palatasynyń janynan qurylǵan jedel shtabqa kásipkerler óz salasy boıynsha túıindi máselelerdi jetkize alady», - dedi Beısen Jolboldıev «Atameken» UKP-da onlaın ótken baspasóz máslıhatynda.

Onyń aıtýynsha, jedel shtab elordada qurylǵan jáne oǵan óńirlerden de habarlasýǵa bolady.

«Qazirgi tańda salalyq bıznes qaýymdastyqtar ókilderimen kezdesýler uıymdastyrylyp jatyr. Kezdesý barysynda kásipkerler óz salasyna qatysty máselelerdi ortaǵa salyp jatyr. Sonymen qatar kásipkerler máseleni sheshýdiń joldaryn usynýda», - deıdi ol.

Aıta keteıik, kásipkerlerge arnalǵan jedel shtab táýlik boıy jumys isteıdi.