Reseı salatyn úsh JEO-nyń tarıfi qandaı bolady

<p>ASTANA. KAZINFORM — Energetıka mınıstrligi Kazinform saýalyna joldaǵan jaýapta Óskemen, Semeı, Kókshetaý qalalarynda Reseı ınvestorlary salatyn úsh jylý-elektr ortalyǵynyń qandaı tarıfpen jumys isteıtini týraly túsinikteme berdi.</p>

— Kókshetaý, Semeı jáne Óskemen qalalarynda úsh JEO salý Qazaqstan Respýblıkasy men Reseı Federatsııasynyń Úkimetteri arasyndaǵy 2024 jylǵy 17 sáýirdegi jobalar boıynsha yntymaqtastyq týraly kelisim negizinde júzege asyrylatynyn atap ótken jón. Bul jobalar iske asyrýdyń bastapqy satysynda ekenin eskere otyryp, Biryńǵaı satyp alýshynyń tarıfine áser etýdi obektıvti esepteý múmkin emes, — dep jazady mınıstrlik mamandary.

Jaýapta qarapaıym turǵyndardyń elektr qýatyn tutyný tarıfi birneshe tarıfterden quralatyny aıtylǵan.

— Sońǵy tutynýshy úshin elektr energııasyn satý baǵasy elektr energııasyn Biryńǵaı satyp alýshynyń baǵasy, elektr energııasyn jeli arqyly berý tarıfi, energııamen jabdyqtaý ústemesiniń qunynan turatynyn atap ótken jón. Elektr energetıkasy salasyndaǵy zańnamaǵa sáıkes energııa óndirýshi uıymdar ózderi óndirgen elektr energııasyn tek Biryńǵaı satyp alýshyǵa satýǵa quqyly. Bul rette, Biryńǵaı satyp alýshy tetigi jańadan engiziletin generatsııalaý kózderiniń joǵary tarıfterin teńgerimdeýdi jáne qoldanystaǵy aktıvterdi jańartýdy qamtamasyz etýge, sol arqyly túpkilikti tutynýshylar úshin tarıfterdiń ósýin barynsha azaıtýǵa baǵyttalǵan, — dep jazylǵan mınıstrlik jaýabynda.

Buǵan deıin Qytaı ınvestıtsııasyna salynatyn jel men kún elektr stansalarynyń tarıfi jarııalanǵanyn jazǵan edik.