Reseı prezıdenti kúzde Qazaqstanǵa kelmek
Kezdesý QR Premer-Mınıstriniń orynbasary - Syrtqy ister mınıstri Murat Nurtileýdiń Máskeýge resmı sapary aıasynda ótýde.
Murat Nurtileý Reseı ádettegideı Qazaqstannyń negizgi strategııalyq jáne bas ekonomıkalyq seriktesi ekenin atap ótti. Eki eldi dostyq pen tatýlyqqa negizdelgen uzaq merzimdi ári berik qarym-qatynas baılanystyrady.
«Ózara is-qımyldyń qarqyndy sıpaty men eki eldiń memleket basshylary arasyndaǵy dostyq qarym-qatynastyń arqasynda qarqyndy, senimdi jáne syndarly ekijaqty saıası dıalog jolǵa qoıyldy. Ekijaqty saýda - ekonomıkalyq baılanys ornatylyp, berik sharttyq-quqyqtyq baza quryldy», - dedi elimizdiń syrtqy ister mınıstri.
«Osy múmkindikti paıdalana otyryp, bıyl kúzde Reseı Federatsııasynyń prezıdenti Vladımır Vladımırovıch Pýtınniń Qazaqstanǵa saparyn uıymdastyrýǵa daıyndyǵyn rastaý baǵytyna alǵys bildiremiz. Ol sapar aıasynda jemisti kelissózder ótip, óńiraralyq forým uıymdastyra alamyz dep oılaımyn. Atalǵan mańyzdy is-sharany uıymdastyrý boıynsha jumys istep jatyrmyz. Forým Qostanaı qalasynda ótedi», - dep tolyqtyrdy Murat Nurtileý.
Reseı Federatsııasynyń syrtqy ister mınıstri Sergeı Lavrov qazaqstandyq áriptesin jýyrda ótken parlamenttik saılaý jáne Premer-Mınıstrdiń orynbasary - Syrtqy ister mınıstri bolyp taǵaıyndalýymen quttyqtady.
«Biz prezıdentterimiz qol jetkizgen ýaǵdalastyqtardy oryndaý, ekijaqty qarym-qatynas sabaqtastyǵyn qamtamasyz etý boıynsha belsendi jumys isteýdi jalǵastyratynymyzǵa senimdimin. Sizde óte baı jumys tájirıbesi bar, sonyń ishinde syrtqy saıasat salasynda. Odaqtas, strategııalyq áriptestik qarym–qatynasty odan ári damyta beretinimizge senimdimin», - dedi Reseı SІM-niń basshysy.
Syrtqy ister mınıstrleriniń konsýltatsııalary «tet-a-tet» rejıminde jáne keńeıtilgen formatta ótýde. Kezdesý qorytyndysy boıynsha Qazaqstan men Reseı syrtqy ister mınıstrligi arasyndaǵy 2023-2024 jyldarǵa arnalǵan yntymaqtastyq jónindegi is-sharalar josparyna qol qoıý josparlanýda.
Eske salaıyq, kúni keshe Syrtqy ister mınıstri Murat Nurtileýdiń resmı saparmen Reseıge baratyny týraly habarlaǵan edik.
Narymbek Ysmaǵulov