Reseı prezıdenti Kaspıı mańy elderin týrızmdi damytýǵa shaqyrdy

AQTAÝ. QazAqparat - Kaspıı mańy memleketteriniń besinshi sammıtinde Reseı Prezıdenti Vladımır Pýtın teńizdiń quqyqtyq mártebesi týraly konventsııaǵa qatysty pikir bildirdi, dep habarlaıdy QazAqparat.

«Konsensýs pen múddelerdi ózara eskere otyryp, zamanaýı ári teńdestirilgen halyqaralyq qujat, ıaǵnı konventsııa ázirlendi. Konventsııa qajetti jikteý sharalaryn, kemeniń júzýi men balyq aýlaý rejimderin aıqyn reglamentteıdi, qatysýshy elderdiń áskerı-saıası ózara is-qımylynyń ustanymdaryn belgileıdi. Sonymen qatar, Kaspııdi tek beıbit maqsattarda paıdalanýǵa kepildik berilgen», - dedi RF basshysy. 

Budan bólek ol Reseıdiń Kaspıı mańy elderimen saýda-sattyq kólemi artyp kele jatqanyn, 2017 jyly syrtqy saýda aınalymy 22 paıyzǵa, bıylǵy qańtar-mamyrda 10 paıyzdan astam óskenin tilge tıek etti. 

Munymen qosa, RF basshysy tsıfrlyq ekonomıkaǵa, týrızmdi damytýǵa nazar aýdarýǵa shaqyrdy. 

«Bizde krýızdik kemeler salynýda, olar Kaspıı teńizi jaǵalaýyndaǵy barlyq elderge saparlaı alady. Meniń oıymsha, bul baǵyttaǵy sharalar bizdiń halyqtardy jaqyndata alady», - dedi Vladımır Pýtın.