Reseı prezıdenti Vladımır Pýtın resmı saparmen Qytaıǵa bardy

<p>ASTANA. KAZINFORM &ndash; Reseı Federatsııasynyń prezıdenti Vladımır Pýtın beısenbi kúni tańerteń Qytaı Halyq Respýblıkasynyń astanasy Beıjińge eki kúndik memlekettik saparmen keldi.</p>

«Bul V.Pýtınniń Reseı prezıdenti qyzmetine jańa merzimge kiriskennen keıingi alǵashqy memlekettik sapary bolmaq», - dep habarlady Qytaı Syrtqy ister mınıstrliginiń resmı ókili Van Venbın.

Onyń aıtýynsha, sapar barysynda QHR tóraǵasy Sı Tszınpın prezıdent Pýtınmen Qytaı men Reseı arasyndaǵy dıplomatııalyq qarym-qatynastardyń ornatylǵanyna 75 jyl tolýy aıasyndaǵy ekijaqty qarym-qatynas máseleleri, túrli salalardaǵy yntymaqtastyq, sondaı-aq ózara múddeni qozǵaıtyn halyqaralyq jáne aımaqtyq máseleler boıynsha pikir almasady.

TASS agenttiginiń habarlaýynsha, Reseı prezıdenti Beıjiń men Harbınge barady. Qytaı astanasynda Reseı Federatsııasy men Qytaı Halyq Respýblıkasy basshylarynyń kelissózderi tar jáne keńeıtilgen quramda ótedi. Reseı delegatsııasynyń quramynda bes vıtse-premer, ekonomıka, dıplomatııalyq jáne qaýipsizdik vedomstvolarynyń basshylary, Reseı temir joldary, Rosatom jáne Roskosmos basshylary, sondaı-aq Reseıdiń 20 aımaǵynyń basshylyǵy bar.

Harbın qalasynda (Heılýntszıan provıntsııasynyń ákimshilik ortalyǵy) Pýtın VIII «Qytaı-Reseı» EKSPO kórmesiniń ashylý saltanatyna jáne aımaqaralyq yntymaqtastyq jónindegi IV Reseı-Qytaı forýmyna qatysady.

QHR Bas keden basqarmasynyń málimetinshe, Qytaı men Reseı arasyndaǵy taýar aınalymy 2023 jyly 240 mlrd dollardan asty.