Reseı prezıdenti: Qazaqstandy adal dos dep tanımyz

<p>ASTANA. KAZINFORM &ndash; Reseı Federatsııasynyń Prezıdenti Vladımır Pýtın Qazaqstandaǵy kezekti memlekettik sapary aıasyndaǵy shaǵyn quramdaǵy kelissózde eki eldiń alys-berisine toqtaldy.&nbsp;</p>

«Búgingi kelissózderdiń qorytyndysy boıynsha birqatar qujat qabyldanady. Olardyń qatarynda Birlesken málimdeme jáne túrli saladaǵy yqpaldastyǵymyzǵa qatysty qujattar bar. Reseı Qazaqstannyń eń iri saýda-ekonomıkalyq seriktesiniń biri bolyp qala beredi. Saýda aınalymy ósti, byltyr onyń kólemi 28,5 mıllıard dollardy qurady. Qazaqstan ekonomıkasyna quıylǵan ınvestıtsııa 13 mıllıard dollarǵa jetti. Árıne, biz azamattyq qoǵam, bilim, ǵylym jáne mádenıet baǵytynda damyp kele jatqan gýmanıtarlyq baılanystarymyzdy baǵalaımyz. Bul turǵyda Reseıde bilim alatyn sheteldik stýdentterdiń basym bóligin qazaqstandyq jastar quraıtynyn aıtsaq jetkilikti», — dedi Reseı prezıdenti. 

Onyń sózinshe, eki eldiń arasyndaǵy aımaqaralyq yntymaqtastyq ta tabysty órbip keledi. 

«Búgin Ýfada kezekti is-shara ótip jatyr. Sizge Reseı-Qazaqstan yntymaqtastyǵyn damytýǵa erekshe nazar aýdarǵanyńyz úshin alǵys aıtamyn. Biz Qazaqstan Prezıdentiniń osynaý mańyzdy jumystarǵa árdaıym yqylas qoıyp otyratynyn jaqsy sezinemiz. Qazaqstandy adal dosymyz jáne jaqyn odaqtasymyz dep tanımyz», — dedi Vladımır Pýtın.