Reseı Ortalyq Azııa elderin ımport almasý baǵdarlamasyna qosylýǵa shaqyrdy

ASTANA. QazAqparat – Reseı Federatsııasynyń prezıdenti Vladımır Pýtın Ortalyq Azııa elderimen kópjaqty kooperatsııany nyǵaıtýǵa daıyn ekenin málimdedi, dep habarlaıdy QazAqparat tilshisi.

«Reseı Ortalyq Azııadaǵy dostarymyzben kópjaqty kooperatsııany nyǵaıtýǵa daıyn. Atap aıtqanda jańa óndiristik-ótkizý tizbekterin qurýǵa qatysý, birlesken kásiporyndardyń úzdiksiz jumys isteýin qamtamasyz etý, sol sııaqty balamaly logıstıkalyq shemalardy qurýǵa ashyqpyz. Sondaı-aq, sizderdiń elderińiz ımportty almasý, basqa da baǵdarlamalar men jobalar boıynsha Reseıdiń aýqymdy bastamalaryna qosylýǵa qyzyǵýshylyq tanytyp otyr, – dedi Vladımır Pýtın Astanada ótken «Ortalyq Azııa – Reseı» sammıtinde.

Onyń aıtýynsha, Reseı - Ortalyq Azııa elderi ekonomıkasyndaǵy jetekshi ınvestor. Tkeleı ınvestıtsııalardyń jalpy kólemi shamamen 5 mlrd dollardy quraıdy.

Sonymen qatar qazir Reseı Federatsııasy kelisimsharttar boıynsha esep aıyrysý úshin reseılik qarjylyq habarlamalardy berý júıesin qoldanýǵa kóship jatyr.

«Bizdiń el Ortalyq Azııanyń birlesken energııa júıesin qalpyna keltirýge praktıkalyq kómek kórsetýge daıyn. Bul óńirdiń barlyq elderiniń energetıkalyq qaýipsizdigin arttyratyny sózsiz. Munaı tasymaldaý baǵyttaryn keńeıtý, Kaspıı teńizinde energııa resýrstarynyń qoryn birlesip ıgerý, qoljetimdi jáne taza gaz motorly otynmen qamtamasyz etýdiń perspektıvasy zor. Sondaı-aq, qubyrlardy salý jáne keńeıtý, kómir saýdasy men ony Azııa naryǵyna tasymaldaý kólemin ulǵaıtý da mańyzdy», - dep tolyqtyrdy Reseı prezıdenti.

Aıta ketsek, Vladımır Pýtın Reseı men Ortalyq Azııa elderi arasynda damyta túsýge ıe salalardy atap kórsetti .

Sondaı-aq, Reseı basshysy Aýǵanstannyń qazirgi bıligimen jumys isteý kerektigin málimdedi .