Reseı mýzeılerindegi qazaqqa tıesili jádigerler elge qaıtarylady

<p>ASTANA. KAZINFORM &ndash; Reseı mýzeılerindegi qazaqqa qatysty jádigerlerdi qaıtarý memleketaralyq kelisim aıasynda pysyqtalady. Bul jaıynda Mádenıet jáne aqparat mınıstrliginen málim etti.</p>

«Túrli sebeptermen shet memleketterge ketken tarıhı jádigerlerdi qaıtarý máselesi ultymyzdyń rýhanı jańǵyrýyna yqpal etetindigi anyq. Mınıstrlik kórsetilgen máseleniń mańyzyn eskere otyryp, otandyq tarıh, muraǵat, mádenıet salasyndaǵy ǵalymdar jáne shyǵarmashylyq ıntellıgentsııa ókilderimen birlesip, shetel asqan qundylyqtarymyz ben artefaktilerdiń tizimin jasaý máselesin pysyqtady», - dep atap ótedi mınıstrlikten agenttiktiń resmı saýalyna oraı.

Vedomstvo málimetinshe, atalǵan tizimge kórshiles Reseıdegi federaldyq mýzeılerdiń qorynan jádigerler engizilgen. 

«Mýzeı salasyndaǵy sarapshylardyń málimetinshe, búginde Reseı aýmaǵyndaǵy mýzeılerde XIX-XX ǵasyrlarda Qazaqstan aýmaǵynda júrgizilgen ǵylymı ekspedıtsııalar kezinde satyp alynǵan nemese syıǵa tartylǵan eksponattar saqtalǵan. Óz kezeginde kóp jaǵdaıda bul zattar qazaq halqynyń memleket retindegi tarıhynda mańyzdy ról atqarǵan tulǵalarǵa tıesili. Sondyqtan bul jádigerlerdi nemese olardyń kóshirmesin elge qaıtarý máselesi sol memlekettiń zańnamasymen eki eldiń arasyndaǵy memleketaralyq kelisim aıasynda pysyqtalady», - dedi mınıstrlikten.