Reseı «Mır» tólem júıesin Irannyń Shetab júıesimen ıntegratsııalady

<p>ASTANA. KAZINFORM &ndash; Reseılikter Irannyń Shetab kartasyn paıdalanyp tólem jasaýǵa múmkindik aldy. Bul týraly Kazinform TASS agenttigine silteme jasap habarlaıdy.</p>

Irannyń Ortalyq bank tóraǵasy Mohammad Reza Farzın Máskeý men Tehran arasynda eki eldiń tólem júıelerin ıntegratsııalaý aıaqtalǵanyn málim etti.

«Kezdesý barysynda taraptar reseılik «Mır» tólem júıesin ırandyq Shetab júıesine qosý talaptary baǵytyndaǵy jumystardy aıaqtady», - dedi ol Sankt-Peterbýrgten oralǵan bette.

Aıta ketý kerek, Mohammad Reza Farzın Sankt-Peterbýrgte Reseı Ortalyq bankiniń basshysy Elvıra Nabıýllınamen kezdesken bolatyn.

Eki júıeni ıntegratsııalaýdyń birinshi satysy 22 tamyzda bastalady. Osylaısha reseılikter Shetab júıesindegi Amber smart-kartalaryn Reseıdegi búkil bankomattarǵa salyp, rýbl sheshe alady.

Integratsııanyń ekinshi kezeńinde reseılikter óz kartasymen Iranda júrip tólem jasaýǵa múmkindik alady. Al úshinshi kezeńde ırandyqtar Reseıde júrip óz kartalarymen tólem jasaýǵa múmkindik alady.

TASS málimeti boıynsha, Reseıdiń «Mır» bankomat kartasy 12 elde jaramdy. Biraq onyń 8-inde karta belgili bir shekteýlermen ǵana jumys isteıdi. «Mır» kartasy Reseıden bólek Belarýs, Kýba elderinde, sondaı-aq, Grýzııa aýmaǵyndaǵy Abhazııa jáne Ońtústik Osetııa kvazımemlekettik qurylymdarynda shekteýsiz jumys isteıdi.

Reseı bul kartany Mysyr, Mavrıkıı jáne Mıanma elderine de engizbekshi.