Reseı men Ýkraınadaǵy qarjylyq dúrbeleń Qazaqstanǵa áser etken joq
Keshe reseılik BAQ Máskeý men Reseıdiń ózge qalalarynda eýro men AQSh dollarynyń tapshylyǵyna baılanysty biraz qıyndyqtar týǵanyn habarlady. RBK saıtynda atap ótilgendeı, dollar men eýro baǵamynyń kúrt kóterilýi halyq arasynda baıbalam týǵyzyp, Reseı bankteriniń keńselerinde sheteldik valıýtanyń tapshylyǵyna ákep soqtyrdy. Nesıelik uıymdar valıýtanyń satylym somasyn «bir qolǵa» lımıtteı bastady. 20 qańtardan bastap Ortalyq bank bekitken dollardyń resmı baǵamy 1,07 rýblge ósti, 28 qańtar kúni ol 34,71-di qurady. Eýro baǵamy 1,96 rýblge kóterilip, 47,50 rýbldi qurady. Dál osyndaı habarlamalar bir kún boıy Ýkraınadan da kelip turdy. Juma kúni valıýtany kassalardan 8,45-8,47 grn/$-ǵa satyp alý múmkin bolsa, demalys kúnderi ol úshin 8,59-8,62 grn/$ suraǵan. Qazaqstanǵa keler bolsaq, keshe tengrinews.kz saıtynda valıýtalyq naryq boıynsha sarapshy Anatolıı Hegaıdyń pikiri jarııalandy. Ol dollardyń teńgege shaqqandaǵy baǵamy osy aptada tarıhı resmı maksımýmdy jańartý múmkindigine ıe, ázirge ol 155,75 belgisinde tur dedi. A.Hegaıdyń sózine qaraǵanda, osy aptada dollardyń teńgege shaqqandaǵy baǵamy 155-155,8 teńgege deıin ósedi dep boljanýda, eýro baǵamy - 210,5-212,5 teńgeni, rýbl - 4,45-4,53 teńge quraıdy. Shyndyǵynda da keshe BTA bank AQSh dollaryn 155,8 teńgege satty, basqa bankterde de dollar baǵamy osyndaı nemese budan sál tómendeý boldy. Qańtardyń 20-24 aralyǵynda Qazaqstandaǵy salyq tólemderine baılanysty dollar kýrsy birshama turaqtandy. Bir qyzyǵy, ótken aptada rýbl kýrsy 4,51 teńgege deıin túsip ketti. A. Hegaıdyń atap ótýinshe, bul 2009 jyldyń mamyr aıynan bergi eń az kórsetkish.