Reseı men Ýkraına qarym-qatynasyndaǵy Qazaqstan ustanymy ulttyq múddege negizdelgen - SІM
Onyń atap ótýinshe, Qasym-Jomart Toqaev Qazaqstan men Reseı arasyndaǵy uzaqmerzimdi strategııalyq qarym-qatynasty eskere otyryp, Vladımır Pýtınmen sóılesip turady. Jáne de bul qatynas jalǵasatyn bolady.
«Qazaqstan men Reseı kórshiles. Bizdi álemdegi eń uzyn 7,5 myń shaqyrymǵa sozylǵan shekara biriktirmeıdi, baılanystyrady. Qazaqstanda 3,5 mln adamdy quraıtyn orys qaýymy turyp jatsa, shamamen 1 mln-ǵa jýyq etnıkalyq qazaq – Reseı azamaty. Bul bizdiń qarym-qatynasymyzdyń qosymsha faktory. Buǵan qosa, Qazaqstan da, Reseı de Eýrazııalyq ekonomıkalyq odaqtyń múshesi. Reseı – Qazaqstannyń iri saýda seriktesi. Árıne, sondyqtan da bul qarym-qatynas saqtalady ári jalǵasady», - dedi Roman Vasılenko basylym saýalyna jaýap bere kele.
Ol Reseı men Ýkraına arasyndaǵy janjalǵa qatysty Qazaqstan óziniń naqty ustanymyn aıqyndaǵanyn eske salyp ótti. Bul ustanym BUU Jarǵysy negizinde Ýkraınany qosa alǵanda, barlyq memlekettiń aýmaqtyq tutastyǵyn qurmetteý qajettigine negizdeledi.
«Qazaqstan úshin bul Marsta nemese aıdalada ótip jatqan janjal emestigin túsiný qajet. Bul atalǵan eki memlekettiń tarıhyndaǵy jáne de búkil adamzat úshin, 20 mln turǵynynyń 3,5 mln-y orystar, 250 myńy etnıkalyq ýkraındyqtar sanalatyn Qazaqstan úshin óte janǵa batatyn, qasiretti jaǵdaılar», - dedi ol.
Roman Vasılenkonyń atap ótýinshe, Qazaqstan qan tógisti toqtatýǵa jáne ony retteýge óz úlesin qosýǵa bar kúsh-jigerin salyp keledi. Sondyqtan da QR Prezıdenti birneshe márte Reseı men Ýkraına úshin araaǵaıyndyq qajet bolǵan jaǵdaıda Qazaqstan kómek qolyn sozýǵa daıyn ekendigin atap ótti.
«Sol sebepti biz qazirgi turǵan ustanymyzdy saqtap qalamyz. Ol bizdiń ózimizdiń ulttyq múddemizge negizdelgen», - dedi Syrtqy ister mınıstriniń orynbasary.