Reseı men Qyrǵyzstanǵa poıyz bıletin alý tártibine ýaqytsha ózgeris engizildi
Kompanııa Reseı men Qyrǵyz Respýblıkasyna barý úshin bılet alý tártibine ózgerister engizilgenin habarlaıdy. Atap aıtqanda, atalǵan eki eldiń shekarasyn kesip ótýge engizilgen ýaqytsha shekteýge sáıkes búginnen bastap poıyz bıletin tek jeke tólqujat nemese sheteldik tólqujat bar kezde ǵana resimdeýge bolady. Atalǵan elderge barý úshin bılet satyp alarda jeke kýálikti paıdalaný tártibi ýaqytsha shekteledi.
«Osy jyldyń 12-13 naýryzynda bıletterdi qaıtarý jáne satyp alý boıynsha azamattar jıi kirgendikten, «QTJ» AQ-tyń BILET.RAILWAYS.KZ saıty baıaý qyzmet kórsetti. 13 naýryz kúni saǵat túngi 23.45 kezinde saıttyń jumysqa qabilettigi qaıta qalpyna keltirildi. Sondaı-aq qazirgi tańda «Jolaýshylar tasymaly» AQ-tyń barlyq bılet kassasy shtattyq rejimde jumys istep tur», - dep habarlaıdy kompanııadan.
«Jolaýshylar tasymaly» bılet satyp alatyn saıt istemeı tursa túsinistikpen qaraýǵa shaqyrady. Sebebi keı kezderi bıletke suranys artyp ketetin kórinedi.
«Bıletti qolma-qol aqshamen de, aýdarymmen de qaıtarýǵa bolady. Naqtyraq aıtqanda poıyz júrmeı turyp 24 saǵat buryn bılet tapsyrylǵan jaǵdaıda tolyq soma qaıtarylady», - dep habarlaıdy kompanııadan.