Reseı men Qytaı kóshbasshylary Astanada kelissóz júrgizdi

<p>ASTANA. KAZINFORM — Reseı prezıdenti Vladımır Pýtın Qytaı Halyq Respýblıkasynyń (QHR) tóraǵasy Sı Tszınpınmen kelissóz júrgizdi. </p>

3 shilde kúni Shanhaı yntymaqtastyq uıymynyń (ShYU) sammıti qarsańynda Pýtın Ázerbaıjan, Mońǵolııa, Pákistan jáne Túrkııa basshylarymen kezdesti. Keshke ol Qazaqstan Prezıdenti Qasym-Jomart Toqaevpen kezdesý ótkizip, odan keıin sammıtke qatysýshylarǵa arnalǵan beıresmı túski asqa qatysady.

Kezdesý barysynda Pýtın Sı Tszınpındi BRIKS sammıtinde kútetinin málimdedi.

«Bıyl biz siz ben bizdiń bastamamyzben qurylǵan BRIKS uıymyna tóraǵalyq etip otyrmyz. Qazan aıynda Qazanda ótetin sammıtke siz de qatysady dep úmittenemiz», — dedi Reseı memleketiniń basshysy Astanada ótip jatqan ShYU sammıtiniń ashylý qarsańynda ótken kezdesýde Qytaı basshysyna.

Pýtın Reseı-Qytaı qarym-qatynasy tarıhta buryn-sońdy bolmaǵan eń jaqsy kezeńdi bastan keshirip jatqanyn, Máskeý men Beıjiń arasyndaǵy yntymaqtastyq eshkimge qarsy emestigin atap ótti.

Kóshbasshylar saýda ósimi, týrızmdi damytý, halyqaralyq uıymdardaǵy, sonyń ishinde ShYU men BRIKS aıasyndaǵy yntymaqtastyq, sondaı-aq basqa da birqatar taqyrypty talqylady.

«Reseı prezıdenti Vladımır Pýtınniń mamyr aıyndaǵy Qytaıǵa jasaǵan sátti sapary eki el arasyndaǵy qarym-qatynasty damytýdyń basym baǵytyn aıqyndaýǵa kómektesti», — dedi Reseı basshysymen kezdesý barysynda Qytaı tóraǵasy Sı Tszınpın.

Ol eki el basshylary qol jetkizgen ýaǵdalastyq qazir tolyǵymen oryndalyp, «kópqyrly yntymaqtastyq josparlanǵan baǵyt boıynsha turaqty túrde júrip jatqanyn» atap ótti.