Reseı men Qazaqstannyń bazalyq mólsherlemesin salystyryp qaraý durys emes – Ulttyq bank tóraǵasy

NUR-SULTAN. QazAqparat – QR Ulttyq bankiniń tóraǵasy Ǵalymjan Pirmatov Reseı bazalyq mólsherlemeni tómendetip jatqanda, Qazaqstan nege bul kórsetkishti ózgerissiz qaldyrǵanyn túsindirdi, dep habarlaıdy QazAqparat tilshisi.

«Keıbir sarapshylardyń Qazaqstan men Reseı ortalyq bankteriniń bazalyq mólsherlemelerin salystyratyny ras. Reseı banki bıyl aqpan aıynda negizgi mólsherlemeniń 9,5%-dan 20%-ǵa, eki ese artýynan keıin ekonomıkanyń quldyraýynan bolyp jatqan deflıatsııalyq protsesterdi eskere otyryp, qarjylyq turaqtylyqty qamtamasyz etý úshin ony 9,5%-ǵa deıin tómendetti», - dedi Ulttyq bank basshysy suhbatta.

Onyń málimeti boıynsha, Reseıde birneshe aptadan beri deflıatsııa baıqalyp otyr.

«Maýsymdyq túzetilgen ınflıatsııa sońǵy ýaqytta mejelengen deńgeıden aıtarlyqtaı tómen boldy. Bul rette mólsherelemeni qarqyndy tómendetý – zańdy qubylys.

Reseıdegi jaǵdaıǵa qaraǵanda, Qazaqstanda retsessııa kútilmeıdi, kerisinshe, iskerlik belsendiliktiń, suranystyń ósýi jaǵdaıynda qosymsha fıskaldyq ımpýls aıasynda ınflıatsııalyq qysym odan ári kúsheıýi múmkin. Osy oraıda, Reseı men Qazaqstandaǵy bazalyq mólsherlemelerdi salystyrý durys emes», - dedi Ǵalymjan Pirmatov.

Eske salsaq, QUB tóraǵasy jyl aıaǵyna deıin ınflıatsııa 13-15% deńgeıinde qalyptasatyny týraly boljamy jasaǵan edi.

Sondaı-aq, ol teńge/rýbl baǵamynyń qalaı retteletinin túsindirdi .