Reseı men Qazaqstan mal jáne qus ónimine qatysty ózara shekteýlerdi alyp tastady
Baspasóz qyzmetiniń málimetinshe, Veterınarlyq baqylaý jáne qadaǵalaý komıteti men «Rosselhoznadzordyń» kelissózderi nátıjesinde mal men mal sharýashylyǵy ónimderin jetkizýge buryn engizilgen ózara shekteýlerdi alyp tastaý boıynsha birqatar másele sheshilgen.
«Qazaqstandyq kásipkerler men veterınarlyq qyzmetterdiń nazaryna joǵary patogendi qus tumaýy boıynsha jaǵdaıdyń turaqtanýyna baılanysty elimizdiń Soltústik Qazaqstan, Aqmola, Pavlodar jáne Qostanaı oblystarynan Reseı Federatsııasyna myna ónimderdi jetkizýge ruqsat etilgenin habarlaımyz. Tiri qusty; ınkýbatsııalyq jumyrtqany; qus etin; Halyqaralyq epızotııalyq bıýronyń Jer ústi janýarlarynyń densaýlyǵy kodeksiniń erejelerine sáıkes, qus tumaýy vırýsyna qarsy óńdelgen taýarlardan bólek, qustan jasalǵan daıyn et ónimderin jáne quramynda qustyń qaıta óńdelgen ónimderi bar Qus sharýashylyǵy ónimderiniń barlyq túrlerin; qustardyń azyǵy jáne onyń qospalaryna; qustardy kútip-baǵýǵa, soıýǵa jáne músheleýge arnalǵan buryn paıdalanylǵan jabdyqtardy jetkizýge ruqsat berildi», delingen habarlamada.
Sonymen qatar, Soltústik Qazaqstan, Aqmola, Pavlodar jáne Qostanaı oblystarynan jóneltilgen tiri qusty Reseı Federatsııasynyń aýmaǵy arqyly tasymaldaýǵa da ruqsat etildi.
«Nıýkasl aýrýy boıynsha Qaraǵandy oblysynan Reseı Federatsııasyna tiri qus jáne ınkýbatsııalyq jumyrtqa, qus eti jáne termııalyq óńdeýden ótpegen, qustarǵa arnalǵan azyq pen onyń qospalaryn, buryn qustardy kútip-baǵýǵa paıdalanylǵan, soıýǵa jáne músheleýge arnalǵan jabdyqtardy, qus ónimderiniń barlyq túrlerin jetkizýge qatysty buryn engizilgen shekteýler joıyldy», delingen habarlamada.
Bul aımaqtan da Reseı Federatsııasynyń aýmaǵy arqyly tiri qus tasymaldaýǵa ruqsat etildi.
«Pasterellez boıynsha jaǵdaıdyń turaqtanýyna baılanysty Reseı Federatsııasyna Qaraǵandy oblysynan kúıis qaıyratyn janýarlardyń barlyq túrlerin, shoshqany, sondaı-aq 72°S temperatýrada 30 jáne odan da kóp mınýt ishinde termııalyq óńdeýden ótpegen janýarlardyń kórsetilgen túrlerinen alynǵan olardyń genetıkalyq materıaldary men mal sharýashylyǵy ónimderin jetkizýge qoıylǵan shekteýler alynyp tastaldy», delingen habarlamada.
Atyraý men Mańǵystaý oblystarynan Reseı Federatsııasynyń aýmaǵyna jetkizýge ruqsat etilgen ónimder: tiri qoı men eshki; qoı men eshkiniń etinen daıyndalǵan ónim, sút jáne sút ónimderi; mal azyǵy; soıylǵan qoı men eshkiden alynǵan basqa da shıkizattar men buıymdar; usaq maldy ustaýǵa, soıýǵa jáne óńdeýge arnalǵan qoldanystaǵy jabdyqtar.
Sonymen qatar, Atyraý jáne Mańǵystaý oblystarynan jóneltilgen tiri qoı men eshkini Reseı Federatsııasynyń aýmaǵy arqyly tasymaldaýǵa ruqsat etildi.
Nodýlıarlyq dermatıt boıynsha jaǵdaıdyń turaqtanýyna baılanysty Atyraý oblysynan Reseı Federatsııasyna jetkizýge ruqsat etilgen ónimder: janýarlardyń nodýlıarlyq dermatıtine beıim iri qara mal; nodýlıarlyq dermatıt vırýsynyń buzylýyn qamtamasyz etetin tıisti óńdeýsiz ІQM-dan, sondaı-aq janýarlardyń sezimtal túrlerinen alynǵan ónim; iri qara maldyń óńdelmegen terisi; ІQM-dyń genetıkalyq materıaly; ІQM ustaýǵa jáne tasymaldaýǵa arnalǵan qoldanystaǵy jabdyq.
Shoshqanyń afrıkalyq obasy boıynsha epızootııalyq jaǵdaıdyń turaqtanýyna baılanysty Qazaqstan Respýblıkasyna tiri shoshqalardy Altaı Respýblıkasynan, Altaı jáne Krasnoıarsk aımaqtarynan, Novosıbırsk, Qorǵan, Chelıabi jáne Túmen oblystarynan jetkizýge jáne Qazaqstan aýmaǵy arqyly tasymaldaýǵa ruqsat etiledi.
Buǵan deıin qus tumaýy boıynsha kúrdeli jaǵdaıǵa baılanysty Qazaqstanǵa Kýrsk, Orlov, Voronej, Chelıabi, Omby, Túmen, Qorǵan jáne Tomsk oblystarynan, sondaı-aq Tatarstan Respýblıkasynan tiri qus pen qus sharýashylyǵy ónimderin ákelýge engizilgen shekteý sharalary alynyp tastaldy.
Budan bólek, tiri qusty, ınkýbatsııalyq jumyrtqany, mamyq pen qaýyrsyndy, qus etin jáne qus sharýashylyǵy óniminiń barlyq túrin, qustarǵa arnalǵan azyq pen onyń qospalaryn, sondaı-aq Saratov oblysynan qustardy kútip-baǵýǵa, soıýǵa jáne músheleýge arnalǵan qoldanystaǵy jabdyqtardy Qazaqstanǵa eksporttaýǵa ruqsat etildi.
Aıta keteıik, buryn aımaqtaǵy Nıýkasl aýrýynyń epızootııalyq jaǵdaıyna baılanysty shekteý sharalary engizilgen bolatyn.