Reseı kovıdke qarsy jańa preparat shyǵarýǵa kiristi
«Mır-19» koronavırýsqa qarsy preparatyn jappaı óndirýge qajetti tehnologııalyq jelilerdi jetildirýge 387 mıllıon rýbl jumsalady. Mundaı buıryqqa úkimet tóraǵasy Mıhaıl Mıshýstın qol qoıdy», - delingen RF premer-mınıstriniń baspasóz qyzmeti taratqan habarlamada.
Qarajat osy preparatty oılap tapqan federaldy medıtsınalyq-bıologııalyq agenttiktiń «Immýnologııa ınstıtýty» memlekettik ǵylymı ortalyǵyna bólinedi. Maqsat - vırýsqa qarsy jańa dári-dármek shyǵarýǵa qajetti qural-jabdyqtardy modernızatsııalaý men satyp alý.
«Mır-19» RF Densaýlyq saqtaý mınıstrliginde ótken jyly 22 jeltoqsanda tirkeldi. Ol ınfektsııany tynys músheleri arqyly emdeýge arnalǵan. Shyǵarýshylardyń aıtýynsha, vırýstyń eselenýin toqtatyp, KVI-diń eń aýyr túrlerin, sondaı-aq qosalqy kezdesetin pnevmonıtter men jiti respıratorlyq dıstress-sındromdarynyń aldyn alýǵa múmkindik beredi.
Buǵan deıin Reseıdiń Gamaleıa atyndaǵy ortalyǵy monoklondy antıdeneler negizinde jasalǵan koronavırýsqa qarsy preparatqa klınıkalyq zertteýdi bastaǵan.