Reseı Qorǵanys mınıstriniń burynǵy orynbasary Roskosmos basshysy qyzmetine taǵaıyndaldy

ASTANA. 11 qazan. QazAqparat - Reseı Federatsııasy Úkimetiniń 2013 jylǵy 10 qazandaǵy № 1839-r «V.A. Popovkın týraly» ókimimen Roskosmos basshysy Popovkın Vladımır Aleksandrovıch RF Federaldy ǵarysh agenttigi basshysy qyzmetinen bosatyldy, dep habarlady keshe keshke Roskosmos saıty.

Eki mınýt ótkennen keıin Roskosmos saıtynda Reseı Federatsııasy Úkimetiniń tóraǵasy D.Medvedevtiń 2013 jylǵy 10 qazandaǵy № 1840-r «Federaldy ǵarysh agenttiginiń basshysy týraly» ókimine qol qoıǵany týraly aqparat jarııalandy, ókimge sáıkes Ostapenko Oleg Nıkolaevıch Federaldy ǵarysh agenttigi basshysy qyzmetine taǵaıyndaldy.

2013 jylǵy 10 qazan kúngi tańerteńgi ýaqytta RF Prezıdentiniń saıtynda V.Pýtın óz jarlyǵymen general-polkovnık O.Ostapenkony Qorǵanys mınıstriniń orynbasary qyzmetinen alyp, áskerı qyzmetten bosatqany týraly aqparat jarııalandy.

Oleg Ostapenko 1957 jyly 3 mamyrda týǵan. Áskerı akademııany jáne Reseı Qarýly kúshteri bas shtabynyń Áskerı akademııasyn bitirgen. Ár túrli komandalyq jáne shtabtyq qyzmetterde Strategııalyq maqsattaǵy Zymyran áskerlerinde (SMZÁ), G.S. Tıtov atyndaǵy Bas synaq jáne ǵarysh quraldaryn basqarý ortalyǵyna qarasty áskerı bólimderde (BSSǴQB ÁB) qyzmet atqarǵan.

2007 jyldyń tamyzy men 2008 jyldyń shilde aılary aralyǵynda - Reseı Qorǵanys mınıstrligi 1-Memlekettik synaq ǵarysh aılaǵynyń (Plesetsk) bastyǵy.

2008 jyldyń shildesinen 2011 jyldyń qarasha aıyna deıin Ǵarysh áskerleriniń qolbasshysy boldy. 2011 jyldyń qarasha aıynan - Áýe-ǵarysh qorǵanys áskerleriniń qolbasshysy bolyp qyzmet atqardy.

Reseı prezıdentiniń 2012 jylǵy 9 qarashadaǵy jarlyǵymen Qorǵanys mınıstriniń orynbasary qyzmetine taǵaıyndaldy. Áskerı ǵylymdar kandıdaty. «Áskerge sińirgen eńbegi úshin» ordenimen, «Áskerge sińirgen eńbegi úshin» medalimen jáne basqa da marapattardy ıelengen.