Reseı qoǵamdyq kelisimdi saqtaýdy Qazaqstannan úırenip jatyr - E. Pıvovar

ASTANA. QazAqparat - Reseı UǴA korrespondent múshesi, Reseı memlekettik gýmanıtarlyq ýnıversıtetiniń rektory Efım Pıvovar Qazaqstan halqy Assambleıasy sııaqty biregeı uıymnan TMD elderiniń úıreneri kóp dep esepteıdi.

"Qazaqstan halqy Assambleıasy biregeı uıym. Menińshe, Qazaqstannyń etnıkaralyq kelisimdi saqtaýdyń mundaı tájirıbesi TMD elderinde joq. Bul úkimet pen qoǵamnyń arasyndaǵy dáneker. Bir jaǵynan ol qoǵamdyq uıym, ekinshi jaǵynan ol bıliktiń ajyramas bóligi sanalady. Sebebi ol el kóshbasshysymen basqarylady. Olar Parlamentte oryn alyp otyr. Bir qarasańyz, saıası kúsh bolyp ta qalyptasyp úlgerdi. Sonymen qatar eldiń ishinde onyń bazasy myqty, sebebi barlyq etnıkalyq uıymdar soǵan qaraıdy. Qazaqtardyń kópultty qoǵamy úshin bul biregeı tájirıbe jáne ol asa mańyzdy", - dep atap ótti rektor "Reseı-Qazaqstan qarym-qatynasy konteksindegi Qazaqstandaǵy saılaý" atty Máskeý-Astana beınekópiri barysynda.

Onyń aıtýynsha, birer jyldar buryn ǵana Reseıde qurylǵan arnaıy agenttik Qazaqstannyń osynaý mol tájirıbesin alyp otyr.

"Reseıde mundaı tájirıbeniń enýi kesh qolǵa alynǵany ókinishti. Bir agenttik qurylyp, ol túrli mınıstrlikterge, keıin ózge bir vedomstvolardyń qaramaǵyna ótti, sońǵy ýaqyttary ǵana óziniń ornyn taýyp, qalyptasa bastady. Qazaqstan halqy Assambleıasy bolsa, onyń óz bıýdjeti bar jáne árdaıym túrli uıymdarmen, etnıkalyq toptarmen tyǵyz baılanysta boldy, qoǵamnyń uıystyrýshy kúshi bola bildi. Qazaqstanda usaq arazdyqtar bolmaıdy degen sóz emes, olar tez sheshiledi, eń mańyzdysy osy. Saılaý barysynda azamattyq tynyshtyq óte mańyzdy ról atqarady. Soǵan oraı qazir biz Qazaqstannan kóp úırenip jatyrmyz. Bizdiń ishki saıası is-qımyldarymyzǵa bul tájirıbe kómektesetini sózsiz", - deıdi E. Pıvovar.